Konoseremos a Alphonse Halimi, el boksor ke era yamado el “Belalı Chiko” o “la Bela Chika”

Metin DELEVİ Judeo-Espanyol
25 Kasım 2020 Çarşamba

Puedeser ya sintitesh ke el anyo pasado eskrivi un livro sovre los sportivos djudios en la istorya sportiva de la Turkiya. I en este livro meti un pasaj sovre los djudios sportivos del mundo en la istorya sportivo mundial. Koza de no imajinar, uno de los mas renomados eran boksores I el mas famozo I se puede dizir el primer, era Daniel Mendoza o komo se konosiya “Daniel el Djudio” en el siglo 17-18. Otra koza enteresante para mozos, el era Sefaradi. Despues de Mendoza, salyeron munchos boksores djudios en la shena del spor mundial, I lo mas de eyos eran Sefaradis. Oy vos va azer konoser un boksor mas kontamporano: Alphonse Halimi.

Se puede saver ke algunos sportivos son djudios por sus nombres o alkunyas, otros amostran sus identidad djudia en las mangas de la kamiza o, komo en el kavzo de Alphonse Halimi, enriva del short de boks.

Nasido en Constantine, Aljeriya, el 18 de Febrero de 1932, Halimi fue el shampiyon mundial de boks de pezo gayo (Horoz siklet) entre 1957-59 i 1960-61. Era el ijo chiko de un lavorante postal i la famiya era ekstremamente prove. Se fuyo de su kaza a la edad de 10 anyos. Halimi se topo a la fin en Algiers i finalmente fue adoptado (I se izo aprendisto, chirak al lado) por un shastre. Sus primeras peleyas fueron en la kaye kon otros chikos. I ansi fue deskuvyerto su talento natural I empeso a antrenar en el gimnasio de Mouloudia en Algiers.

Kuando Halimi empeso a suvir al ring para maches amatores, se izo remarkar kon sus shortes de boks sovre los kualos estava kuzido un Magen David, una estreya de David kolorado I vedre.  Sus reushitas amatores atiraron la atansyon de syertos, I ansi fue yamado a la Fransiya, ande gano los titolos de amatores en 1953, 1954 i 1955. Tambyen en el anyo 1955 gano el titolo de Shampiyon de los Djugos del Mediterraneo. Ansi, ya aviya vinido el tyempo de "azerse profesyonal".

Yamado “la Petite Terreur” (El Chiko Belali), Halimi gano munchos shampiyonatos  en la Evropa i Amerika. En Junyo de 1962, Halimi partisipo en el primer mach de boks profesyonal en Israel, kuando lucho I gano kontra el boksor İtalyano Piero Rollo.

Kuando se retiro de los ringes en 1964, Halimi teniya 41 viktoryas rejistrados, (onde los 21 eran por knock-out), 8 peryitas i 1 igualidad. Despues de eskapar su kariyera profesyonal, kontinuo komo antrenador de boks I komo instruktor de natasyon. Charles de Gaulle lo rekompenso i lo onoro kon la Lejión de Onor. El fue tambyen inkluido en el Salon Enternasyonal de la Fama de Sportivos Djudios.

Halimi peryo la vida despues de una puntada el 12 de Novembre de 2006.

Siz de yorumunuzu yapın

Tüm Yorumları Görün