El Simeteryo Djudyo de Bodrum

Silvyo OVADYA Judeo-Espanyol
12 Ocak 2022 Çarşamba

   Bodrum: un kazal turistiko ke se topa al sud de Smirna; los anyos dalkavo fue  muy popular; i ay famiyas Djudias ke biven en este kazal (mas grande ke una sivdad) en invyerno. No se kuantas ma kreo ke son mas de 100-150 personas. No vos esto avlando del anyo pasado. Porke kon la korona ay munchas famiyas ke pasaron el invyerno aya. Si avlamos del enverano, ay miles de personas de muestra komunidad, mizmo djudios turkanos ke biven en las Amerikas, en Fransia, en la Ingelterya, en la Suis i otros payizes ke tyenen kazas en Bodrum i ke vyenen unos kuantos mezes a kedarsen aya.  

   Anyos antes mos disheron ke se topa un simiteryo kon tombas de Djudios en Bodrum, en el sentro del kazal. Ma sin dinguna proteksion. Un anyo antes en una revista aparesyo un artikolo sovre este simeteryo i la sinyora Sibel Haleva, ke bive en Bodrum, se entereso i dyo karar de restorar este terreno ande se topa mas de 30 tombas istorikas. El simeteryo es istoriko porke no se emplea mas. Ya savemos ke dos korelijyonarios fueron enterrados en Bodrum los anyos dalkavo ma no en este simiteryo. Ya savemos ke el istoryano famozo Avram Galante es orijinario de Bodrum. Nasio aya, estudio en la eskola primera Djudia de Bodrum i despues en una eskola Otomana. Despues se fue a Rodes i estudio aya. Ya savemos ke fue profesor en la Universitad d’Estanbol i deputado de la sivdad de Niğde entre los anyos 1940 i 1943. Despues ke eskapo su mision de deputado, empeso a eskrivir la Istoria de los Djudios Otomanos i Turkos. Estava bivyendo en la izla Kınalı.

   Ya savemos ke publiko munchos livros i todos sus livros ke fueron publikados en Fransez fueron republikados por la Kaza de Publikasion ISIS en 1989. Una ovra de 9 volumes.

   Martes, el 4 de Enero, bolimos a Bodrum kuatro personas: Moris Levi, vise Presidente de muestra Komunidad, El Rav İsak Peres ke es miembro del Bet-Din, Hayim Hason ke es responsavle de la edukasion relijiosa i de syertos sujetos relijiozos, i yo presidente de la Fondasion de los 500 anyos i ke se enteresa en munchos sujetos kulturales.

   Kuando estavamos en Bodrum fuimos resividos por la munisipalidad de Bodrum. I mos fuimos a la Biblioteka Nazım Hikmet ande se realizo la deklarasyon de prensa. Despues pasimos a la otra parte del parko para la avyertura de la estatua del Sinyor Avram Galante.

   I despues pasimos al Simeterio Djudio ke fue restorado i entornado kon paredes i teles para ke las tombas no sean atakadas. Ya savemos ke en este simiteryo egzisten mas de 30 tombas no muy antiguas. Komo eramos mas de 10 ombres Djudios, pudimos meldar un kadish kon muestro rabino.

   Despues de komer, mos fuimos a un otro lugar serka de la Vieja Maalle Djudia ande mos yamaron de un magazen para darmos una plaketa del Doktor Santo Galanti. Ya entendemos ke la famiya Galante bivyo muncho tyempo en este kazal i savemos ke la mas grande partida de los Bodrumlus vinieron de Milas.

   Para esta okazyon la Munisipalidad de Bodrum aparejo una mueva impresyon del livro “La Istoria de Bodrum” de Avram Galante en turko.

   Egzistia una chika sinagoga en este kazal. Ma oy en diya no savemos egzaktamente ande se topava. Es enteresante de ver ke ay tres simiteryos en un kazal tan chiko ande bivyeron muy pokos Djudios. Muestro amigo, Hayim Beraha, ke es un arkitekto, kere aparejar en el simiteryo un lugar para amostrar a los ke lo vijitan la istoria de los Djudios Bodrumlus. Eskapimos la seremonia dando la yave del simiteryo al prezidente de la Munisipalidad, Ahmet Aras. Es Sibel Haleva ke le dyo esta yave.

 

Siz de yorumunuzu yapın

Tüm Yorumları Görün