LA KAMARETA KOLORADA

Eliz GATENYO Judeo-Espanyol
27 Ekim 2021 Çarşamba

Ay kuantos kanales de televizyones ke kada uno tienen diversos programes. Ken i ken va meter un program enteresante, seya filmo, seriya, spor, diskusyones politikas o otros sujetos, programes para kriyaturas i mas. Konosko djente ke no fuyen ni una seriya, ni un filmo de la semana. I si barbinam lo fuyo, pishin se va al diya a verlo de la komputadora. Kon la moda de agora todos los artistos mansevos tienen barvas i mustachos, i las mansevikas tienen kaveyos largos, de sorte ke todos i todas se paresen. No se entiende ken es ken,  i ken djuga ande? Kaje en kada seriya de televizyon ay entrigas, amor i en munchas ay armas i matansinas. Los ke kontrolan los filmos, no permeten ke se amostre sigaros i bevyendas alkolizadas en los filmos, ma para las armas no dizen nada. Yo penso ke estas matansinas pushan  los mansevos a la violensya.

Entre estas seriyas de televizyon ay una ke no parese a las  otras. Es una seriya ke fue tomada de los livros de una Psikiyatra ke se yama Gülseren Buğdaycıoğlu. Mos amostra diversos kavzos de sus hazinos psikolojikos. En estos filmos vemos komo un evenimyento puede danyar la vida de una persona.

Vos kero kontar uno de estos kavzos enteresantes. Vemos ande la psikiyatra una mansevika ke tiene halusinasyones. Dizyendo ke tiene el meoyo embrolyado. En avlando avlando ke ampesa a kontar su vida, entendemos ke la baza de esta hazinura viene de su madre. En el rolo de su madre vemos muestra alavada i talentada artista, Rozet Hubeş. Eya djuga el rolo de una madre muy muy disiplinada i fuerte. Tiene dos ijas donde la grande es frivola i la chika es kayadika. La ija grande kere salir, kaminar, saltar i baylar ma la madre no le permete,  alora ke la chika ke es esta mansevika, oye todo lo ke le dize la madre.  La psikiyatra aze avlar la mansevika para entender avagar avagar, la razon de su hazinura. Despues entendemos ke la ija grande se suisido i danyo la psikolojiya de la chika. La madre ke kere ke la ija grande se kede en kaza, ke no salga afuera kon las amigas, ke no se vista vistimientas modernas, ampeso a darle unas kuras sozde vitaminas para enforteserla, para ke la ijika eskayga de sus fuersas, ama eran kuras ke la endormesiyan. Ansina no teniya fuersas para salir i kaminar. A la fin, la ijika entendyo ke es la madre la kavza de sus desfuersas i para salvarse de su madre se echo del balkon abasho. Esto todo ya lo vido i la ijika chika i se le bozdeyo la psikolojiya. Dainda no eskapo este kavzo. Ma ya savemos ke la ijika se va kurar grasyas a la psikiyatra muy savida i kerensyoza.

Kero avlar de Rozet Hubeş tambien, ke las miradas i las avlas, las mimikes de su kara mos amostra halis una mujer de espantar. Parese komo un sfenks. Vos dizere ke si la veyo en la kaye me va espantar. Shakas siguro, porke la konosko en verdad. Eya se emburuja kon grande maestrad en el rolo ke eya djuga. La felisito.

 

Siz de yorumunuzu yapın

Tüm Yorumları Görün