La Muncha Miel Bulanea

Judeo-Espanyol
21 Nisan 2021 Çarşamba

Hayim Behmoaras

En vezes oyimos unas palavras ke son muy djustas. Komo: Todo Kon Karar, Kon Yesod.

En la vida kale saver karar. Komo, lo poko no es bueno, i lo muncho es lo mizmo.

Aviya un ombre ke era rikinyon; teniya fabrikas, i magazenes, toda la vida la paso en lavorando, i kontando las ganansyas. I vino a los 78, los anyos estan 

pasando, i le empeso unas problemes psikolojikos. Kon la mujer kedo dakordo para irse a un doktor. I vino al doktor, empesaron a avlar, el doktor le demanda, i el konta...

Kuando se eskapo la konversasyon le demando: Te vas a viyajar?

No puedo, no tengo tyempo para esto, en la vida no sali ni una vez. Deke disho el doktor, no topates tyempo de kontar las ganansyas parese. Se amargo la kara del hazino, i se kedo kayado.

Te plaze peshkar?: Si komo no? Muncho me plaze ma no tengo tyempo para esto

le disho.

Te esto dando la resefta le disho el doktor. Toma a tu mujer i vate muy leshos i

peshka aya. Despues de 15 diyas ven avlaremos.

I komo disho el doktor, tomo a la mujer i partyeron a Miami, despues ke se deskansaron un diya, abasharon a la marina i aya demandaron ken es el mijor peshkador de aki. Le amostraron, mira allado del arvole esta, disheron.

Avlaron kon el peshkador kedaron dakordo i kon la barka salyeron a la mar. El 

aver, la mar, las komidas, todo estava maraviya.

Le demando al peshkador komo pasas el diya, komo te mantyenes. I le 

empeso a kontar.

Demanyana mos alevantamos azemos un buen dezayuno kon mi mujer,

despues kaminamos 2 oras, kuando se eskapa el paseo si ay de empleyar empleyamos, si no tornamos a kaza. Yo me lavo, i despues

kon la barka salgo a peshkar, solo 2 oras. I torno kon 2 peshkados grandes

i los vendo a los balukchis. 

Me vo a kaza de muevo me lavo i un poko me repozo. A la tadre bevemos un

chayiziko, i miramos un filmo, u meldamos livros. A la noche despues de komer

salimos kon los amigos, u a un kafe para bever, u a un klup para baylar. La vida mos pasa este modo.

Esto es todo? le disho el ombre. Deke no lavoras mas muncho, por egzemplo si lavoras 4 oras peshkas mas muncho, i kuando lo vendes ganas mas. Despues pasa tyempo kon la ganansya trokas la barka, te merkas una mas grande, i mueva. Peshkas mas muncho i ganas mas.

Despues? disho el peshkador!

Despues avres una botika i los peshkados los vendes tu, se aze la ganasya dopyo, kon la ganansya te merkas 2 kamyones i te vas a la otras sivdades para vender peshkados.

Despues? le disho el peshkador!

Agora ke te izites rikinyon pasha, gozatelo, demanyana alevantate tadre, kon tu mujer aze un dezayuno maraviyozo, despues salish a kaminar  2 oras, vini a kaza, tu te lavas i te vas kon la barka a peshkar kon kefiziko.Tornas, te repozas en la tadre, bevesh un chayiziko, u vesh un filmo, sino meldash un livro, i a la noche kon los amigos salish. U a un kafe para bever, u a un klup para baylar; la vida es este modo; gozatelo pasha...

El peshkador lo miro, lo miro, lo miro i le disho:

Yo sin azerme rikinyon lo ke kontates agora ya lo esto azyendo, i kada diya kon lo ke gano esto muy orozo.

Kerido si kon lo ke tyenes, i kon lo ke ganas si estas kontente sos la persona mas oroza del mundo.

 

LA MUNCHA MIEL BULANEYA

 

Siz de yorumunuzu yapın

Tüm Yorumları Görün