Ay unos kuantos dias ke me embiyaron la foto de un livro ke fue publikado kreo por la Munisipalidad de Edirne. El livro tyene el titolo de: “Cumhuriyetin ilanından sonra Edirne’de Yahudi Varlığı ve Kültürü / La Prezensia i la Kultura de los Djudios en Edirne despues de la proklamasion de la Republika Turka”. La autora del livro es Merve İstil. No se ken es i no la konosko. Ma espero ke eskrivio un livro komo le demandaron. Es un evenimyento realisado por la Munisipalitad de Edirne. Devemos de rengrasyar el Sinyor Recep Gürkan; presidente de la Munisipalitad d’Edirne i de Aydemir Ay ke lavora sovre los echos kulturales de la Munisipalitad.
Una otra novedad: una otra damma Djudia orijinaria de Edirne dyo karar de tornar a Edirne. I empeso a bivir aya. Agora ay tres Djudios ke biven en esta sivdad.
Ay unas kuantas semanas ke me embiyaron un whatsapp i una otra koza ande estavan kontando sovre el sinyor Mişel Ovadya. Ken es Mişel Ovadya? Ay munchos anyos ke lo konosko. Kon Mişel lavorimos en la mizma epoka en la Komision de la Kisba. Kisba es la organisasion ke arekoje moneda de todos los Djudios ke biven en Estanbol para formar la mas grande partida del budjeto de la Komunidad Djudia. I ay dos diyas ke me embiyaron de difrerentes grupos los mismos filmos i fotografias. Mi amiga Tilda Levi me disho ke la djente va ser muy enteresados de ver Mişel kon la uniforma del Bando. Kreo ke tyene razon. I es por esta razon ke esto eskrivyendo sovre este sujeto. Mişel ke nasio en el 1938 en Edirne, a sus 17 anyos fue miembro del bando de la Munisipalidad i serka de 10 anyos tanyo su trompeta. Reelmente es muy enteresante de ver en una sivdad komo Edirne ande todos los Djudios ke bivian no moran mas ayi i el Presidente de la munisipalitad i munchos otros son maraviyados de los Djudios. Mişel ke ay anyos ke bive en Estanbol, despues de su 83 anyos se fue a Edirne para ver su sivdad ande nasio. Es djusto ke estava aya en el 2019 por la primera vez despues de la restorasion de la Grande Sinagoga kuando organisimos un konsyerto. I kreo ke vijito su kaza ande nasio i ande bivio. I el presidente aparejo el Bando para resivirlo. Ya se ke la famiya Ovadya tenian un echo en Edirne asta los anyos 70.
El presidente de la munisipalidad, Recep Gürkan es un ombre ke tyene una grande sempatia para los Djudios. Los Djudios ke dyeron munchas kozas a esta sivdad.
El estava pensando mizmo de formar una kaza Djudia en el Kaleiçi; kuartier ande bivyeron los Djudios, antes de la mueva epoka para ke sea una kaza Djudia komo un museo i mizmo un restoran ande se presenta komidas Djudias. Todos los ke tuvyeron la posibilidad material trokaron de mahalle para bivir en los muevos kuartieres de esta sivdad.
Espero ke la Komunidad de Estanbol va kontinuar sus relasyones kon Edirne kon la Sinagoga maraviyoza ke egziste.
