Hag Sukot Sameah

Silvyo OVADYA Judeo-Espanyol
23 Eylül 2021 Perşembe

  En estas fiestas del mez de Tishri ke no vos pareska ke estamos mas en repozo ke los dos anyos dalkavo. Malorozamente no pudimos azer muestra orasion de Rosh Ashana en el Templo de Neve Shalom. Ma no fue la mizma koza para el diya de Kipur. Mizmo ke moro a 20 puntos de la sinagoga de Neve Şalom, noche de mierkoles alkansi en una ora i media al Neve Şalom porke avia un mach de futbol en muestro kuartier. Entri a la sinagoga porke avia kritikado deke no avrieron en Rosh Ashana. Los dirijentes puedeser ke tienen razon ma vimos ke serka de syen personas (kuarenta mujeres) estavan en la Keila la ora de la Neila. Agora empesa la fiesta de Sukot. Hag Sukot Sameah.

  El mez de Oktobre el Şalom va publikar el 200en egzemplaryo del Amaneser. Reelmente kuando empesimos a publikar este suplemento no pensava ke ivamos a publikar mas de 16 anyos. I reushimos. Karen es la pioneria de este evenimiento. Ma ke no vos pareska ke lo reusho sola. Es los ke eskrivyeron ke tomaron parte en esta reushitad. Karen me disho ke este numero lo vamos a aparejar spesialmente, 48 ojas sin el Meam Loez. I pensi ke devia eskrivir sovre los paryentes de mi madre, Sara Palatchi de Brusa i Salamon Profetta de Hasköy ke se enkontraron en Paris i mi madre fue la segunda fruta de este kazamyento. Kero saver lo ke pensan la djente despues ke meldaron este artikolo. No se si so kapache de eskrivir un livriko sovre el pasado de mi famiya. Puedeser ke el granpapa de la parte de mi padre – no lo konosi - era mas enteresante. Se kazo tres vezes. Se kito de la primera mujer porke era muy ermoza. Muy ermoza para el. I despues se kazo de muevo; no se si era ermoza, ma no dayaneo al papu. I la tresera era Sara Ovadya nasida Ancel. Todos la kerian muncho. I eya malorozamente se muryo manseva. Mis tiyas i mis tiyos tenian, de la mas aedada al mas mansevo, kreo a lo manko vente o vente i sinko anyos de diferensia. La ija de mi tiya tenia un ijo de mi aedad. Reelmente esta epoka era muy diferente. El gran papa Salamon era nasido kreo en el 1880. Amanyana va bushkar ofisialmente para topar el anyo ke nasio. Ya se ke era Estanbolli. Mizmo si lo va eskrivir en Djudezmo, mis kriaturas o mis inyetos van a pueder saver sus pasados. Deke esto preferando de eskrivir en esta lingua. Kreo ke estamos eskrivyendo komo se avla esta lingua. No es la mizma koza en fransez o en turko. Devesh de eskrivir mas literario.

Ayer avia muncho tyempo ke no me iva a una boda (dia i noche). Muestro amigo Mois Gabay ke es un giador emportante sovre el Djudaizmo d’Estanbol, eskrive artikolos en el Şalom i es miembro de la administrasion de la Fondasion del Museo Djudio se kazo. Les oguro kon su mujer Ceyda una vida oroza kon munchas kriaturas. Mois komo lavora muncho kreo ke van a realisar una luna de miel muy kurta.

El 30 del mez de Septembre tenemos una prezentasion del livro de İzzet Keribar i Naim Avigdor Güleryüz sovre las sinagogas de Turkiya. No vos olvidesh ke vamos a pueder vijitar las sinagogas de Ahrida i de Yanbol un mez entero. Ya puedesh dar konsejos a vuestros ijos i inyetos para ke vijiten estos dos monumentos.

 

Siz de yorumunuzu yapın

Tüm Yorumları Görün