KULÜP

A los kreadores de la seria KULÜP – Felisitasiones i sinseras grasias... GÖKÇE BAHADIR – Mersi... Kon el rolo de una mujer Judia yamada Matilda, mos elevates...

Esti SAUL Judeo-Espanyol
24 Kasım 2021 Çarşamba

Matilda inkarno elegantamente el rolo de la mujer Judia Turka...

Realizado por azermos arebivir la nostaljiya i akodrar los suvenires de los anyos 1950, kon un senario perfekto, merese palmas i gratitud...

La atmosfera del filmo se prezento maraviyozamente, i kuriozamente, el mundo se entereso i apresio el filmo, onoro la komunita Judia de muestro payis.

Tomaron parte nombrozos amigos Estambullis, aktores, muzikologes, istorianos, eskrivanos Judios.

Los felisitamos por sus kontribusiones. Sus rolos lo inkarnaron bien i mos reprezentaron.

No me va olvidar ni de la silueta, ni del djugo de Matilda, i su fraza: “YO SO TU MADRE!”, korajozamente kuando, despues ke fue prisoniera por 17 anyos, tuvo mazal de enkontrar su ija por la primera vez.

La mujer prove ma noble, kon su mirada fiksa, embolvida en sus penserios, korajoza, pozitiva, silensiozamente enfrentando las trajedias de la vida.

Peryo su famiya, ma no su dinyidad. No aboko la kavesa, no peryo su esperansa, no dezespero, sovreguadro su enerjiya, malgrado su tristeza. Me entuziazmo, koriendo los koridores del bar Kulüp para salvar las ijas jovenes de las negriguras ke enkontran en sus kaminos, i ganar su vida, kon su lavoro por segundar, servir SALİH BADEMCİ, artisto remarkavle (el kantador del bar Kulüp), i su ermozo kante, “HEP BERABER MATİLDA”.

Enumerar las kualidades de la mujer Judia, Matilda, ke kontinuo a guadrar su kreensia, amar i respektar su relijion i su Kriador, me dio envidia.

Mersiii, Gökçe Bahadır!!!

No me va olvidar del djugo apropriado de ASUDE KELEBEK (Raşel-Aysel), una ija rebelde, kombativa, impulsiva, ke se engrandesio en el orfelinato i ke no konosio su famiya... Bravo...

 

El filmo me yevo a İstiklal caddesi, ke era serka de mi eskola, NDS i mi grande plazer era de kaminar kon Sara, mi mami, en Shabat, para ver un filmo en Yeni Melek o Atlas i enkontrar los jovenes de mi jenerasion.

 

Un grande rengrasio a NETFLIX i su filmo Kulüp...

 

En 1952, Galatasaray. Mi mama i yo.

Siz de yorumunuzu yapın

Tüm Yorumları Görün