Inondasiones i fuegos en los kuatro puntos de la Turkiya i del Mundo

Silvyo OVADYA Judeo-Espanyol
5 Ağustos 2021 Perşembe

Reelmente no se kualo afito? Ma savemos ke el klima del mundo se esta trokando. En muestro payis, en Turkiya ya savemos ke ay syen miles de kazas ke son fraguadas illegalmente. Ya puedesh topar una kaza ke fue  fraguada ensima del lecho de un rio ke no tyene mas agua. Ma ya savemos ke la agua de las inondasiones va korrer por estos kaminos i las kazas van a ser inondadas. Komo no pueden merkar un tereno para fraguar una kaza la azen entre los arvoles, mismo en medio de la shara. Ma no entendi komo en un payis komo la Alemanya o la Beldjika vimos inondasiones ke mataron sienes de personas. En la Alemanya kreo ke no es posivle fraguar en un lugar ke no es permetido. I un Aleman no pensa de fraguar su kaza en un lugar ke no es permetido. Malgrado esto, los Alemanes bivyeron una desgrasya dos semanas antes. La mizma semana serka de la Mar Preta en Rize, vimos desgrasyas kon las inondasiones. Savemos ke el Kamino prinsipal de la Region de la Mar Peta no fue echa komo se devia. Del primer diya meldimos un alay de kritikas por esta konstruksion. Ma las inondasiones no estan afitando solo en esta rejion. Oy en Van, en Başkale, kazal ande bivyeron buen karar de djudios asta los anyos 1960-65, fue inondada. I grande desgrasya. Mizmo sus vakas i sus kavras se aogaron en estas aguas. Ke pekado. Esto era todo la fortuna de estos kazalinos.

   Vimos en la media komo empeso el fuego en Marmaris ke es reelmente “Un Ganeden”. Es aya ke se realiza la mas grande produksion de miel. Dos ijikos de dyes anyos dyeron karar de kemar dos o tres livros. I los kemaron. Ma vyeron ke los livros se tutushearon de mala manera. Tomaron dos bokales de kola i kijeron amatar el fuego. Kuando no reusheron kon el aire ke estava asoplando muy fuerte, se espantaron i se fuyeron, i esto fue la vizyon trajika de Marmaris. Reelmente una desgrasia. Un amigo ke tyene un yat i ke pasa el enverano en la mar en Marmaris, diya de alhad, vijito syertos kazales i vido la desgrasia. Disho ke todas las bisbas i sus nidos fueron kemadas i ke kalia ayudar estos kazalinaos ke pyedreron todas sus propriedad. Ya savemos kon esta kayntor (entre 30 i 40 grados); sin umididad (en syertas rejiones estan avlando de una umididad de 10%) i kon un ayre muy fuerte estos fugos se estan realisando en todos los payises Mediteraneos komo la Gresia, la Italia, la Fransia i otros payises.

   Los fuegos no se afitaron solo en Marmaris. Malorozamente en tres diyas vimos mas de 80 fuegos. Kreo ke esto no es posivle. En 10 puntos 4 fuegos en el mizmo kazal. No se los ke realizaron, ma esto siguro ke la grande partida era el resultado de syertyos sabotajes. De la parte de ken? Esto no lo se. El governo dyo karar para ke las personas no entren en las sharas un mez entero i oy no es permetido de asender fuego para asar karne. En Milas, en Bodrum, en Manavgat, en Antalya i en munchos lugares estamos viendo fuegos i el Türk Hava Kurumu ke era responsavle de los aviones ke amatan los fuegos en echando agua fueron metidos en un hangar los 10 anyos dalkavo i el governo esta pagando kada diya mas de un milion de dolares para alkilar estos aviones. Reelmente no es possivle de entender la manera de pensar.

Espero ke antes del muevo numero del Şalom todos estos fuegos i inondasyones van a topar fin.

Siz de yorumunuzu yapın

Tüm Yorumları Görün