Ekspozisyon komemorativa del Oloksto en un muzeo de Dubai

Dora NİYEGO Judeo-Espanyol
7 Temmuz 2021 Çarşamba

We Remember, una ekspozisyon komemorativa dedikada a las víktimas del Olokosto, se
inoguro en Dubai.
En el Muzeo Crossroads of Civilizations, de propiedad privada, los organizadores disheron ke
esta es la primera egzibisyon sovre el Olokosto en el Golfo.
El muzeo se inoguro kon la prezensya de Eitan Na'eh, ambasador de Israel en los Emiratos
Arabos Unidos, i Peter Fischer, ambasador de Alemanya en los Emiratos Arabos Unidos.
“Es muy emportante para mozotros ke mos konsantremos a edukar la djente sovre las
trajediyas del Olokosto porke la edukasyon es la remediya de la inyoransya”, disho el
fondador del muzeo, Ahmed Obeid AlMansoori.
La ekspozisyon inkluye seksyones istorikas ke mostran elementos ralos komo un livro de
orasyones judiyas, de la sivdad de Worms, Alemanya. Su emportansa es relasyonada kon los
lideres spirituales de la komunidad judiya en Worms.
El orijinal de este livro de orasyones fue salvado de la Kristallnacht, o la Noche de los
kristales rotos, un pogromo kontra los judyos, ke fueron asasinados por las fuerzas nazis en
Alemanya en novembre 1938.
Otra parte de la ekspozisyon esta apartada a los muzulmanes ke ayudaron a salvar vidas
judiyas durante el Olokosto. Uno de eyos es Mohammed Helmy, un doktor ejipsyano ke
bivyo en Berlín durante la gerra. No solo prokuro un refujyo seguro a los judyos ma tambyen
ayudo a sus menesteres medikales.
Tambyen esta en la egzebisyon la istorya de Selahattin Ülkümen, un diplomatiko turko ke
estuvo destinado en la izla grega de Rodos durante la Segunda Gerra Mondyal. En 1944, el
Gestapo kijo reunir la populasyon judiya de la izla para transportarlos a Auschwitz. Ülkümen
salvo los sivdadinos turkos porke Turkiya en este momento se konsiderava nutral durante la
gerra. Aunke el diplomatiko pudo garantizar la seguridad de los judyos turkos, los nazis
apanyaron los ke eran de nasyonalidad diferente i embiyaron a mas de 1.600 judyos a los
kampos de konsantrasyon.
En la ekspozisyon We Remember, tambyen ay fotos de las viktimas del Olokosto: Una
kreatura en el geto de Varsovya kon una ekspresyon espantoza en la kara i sus manos en el
ayre.

Ay tambyen egzibisyones sovre Ann Frank i Petr Ginz. El diaryo de Ann Frank es uno de los
testimonyos los mas famozos sovre el Olokosto. Peter Ginz era una kreatura chika ke desino
una pintura enkyetante de la Tyerra komo se esta vyendo de la Luna.
Tambyen ay testimonyos de sovrebivyentes i istoryas de komunidades judiyas pedridas en el
Olokosto.
El muzeo esta sentrado a las valores de avyertura i multikulturalizmo del EAU.
‘Un muzeo en Dubai ke realize una egzebisyon en memorya del Olokosto es muy emportante.
Es un lugar ande puedemos trayer eskolas de diferentes komunidades para ke vengan a ver la
istorya del puevlo judyo i lo ke bivyeron en Evropa’ disho Ahmed Obeid AlMansoori
Mas de sesh milyones de judyos fueron asasinados por los nazis entre 1941 i 1945. Esta
egzibisyon tyene komo objektivo akodrar lo ke afito en el Olokosto i edukar las 200
nasyonalidades de Dubai sovre el Olokosto.

Siz de yorumunuzu yapın

Tüm Yorumları Görün