I la Moda kontiene Elementos de Arte Tuvo enteres en el arte tambien i pintó tablós...

Esti SAUL Judeo-Espanyol
23 Haziran 2021 Çarşamba

David Bowie avia realizado una seria de 47 tablos. 

DEAD HEADS (Kavesas Muertas)

Uno de estos se va vender en Canada, el 24 de Junio, por Cowley Abbott Fine Art (Toronto) en "vente aux enchères" por 157 dolares. Se pensa ke topara kliente...

Una dama ke no revela su nombre, lo avia topado en un magazen de sigunda mano i avia pagado 4 dolares.

La ovra se avia topado en un chop el enverano pasado.

David Bowie tenia solo 69 anyos kuando peryo su vida en 2016.

 

***

 

Las mujeres mos plaze saver LA MODA, los kaprichos de los Artistos Modistos, ke en sus koleksiones, demostran sus invensiones "dernier cri" komo dizen los Fransezes.

Pretenden reflektar, por egzemplo, la optika kon las formas de Cocoon/Koza, el blu elektriko, el kolorado, el amariyo, komo si fuera refleksiones de un kaleidoskopo.

Se apersive sus impresiones.

Siertos demostran la inspirasion del Kubizmo i Suprematizmo...

Los ke tienen anyos en kuti diran:

“Bueno, ken se va vistir estas kreasiones, kon payetas, flores, kreasiones fantastikas?

Los reyes de la "Haute Couture", artistos reputados modernistos del sektor, projetan i se preparan para sorprender los mansevos, sovre todo, suivando las linyas de la sezon...

El suenyo de bushkar el “fostan de novya”, sea de seda, sea de dantela, ke le va ir,.. para gozar del dia ke le abashara la "shehina”.

Los modistos prezentan sus koleksiones en los defilés, komo mozos ke enkolgamos los tablós en los bienales i ekspozisiones, uno detras del otro.

El espasio es importante entre las ovras.

La realita es ke los artistos, en todas las partes del mundo, mos inspiramos de la natura...

Koleksiones de grandes modistos inspirados, por egzemplo, del manto i los desenes, de Jean Cocteau, sin olvidar el fostan preto es, komo se dize en Turko, “olmazsa olmaz", sierve para las okaziones seriozas. o otras... Deven de egzistir en muestra "Garde Robe”...

Absolutamente, chizmés largos i jaketas de tweed, un klasiko ke no se piedre.

Las bluzas (bluzon), senturas finas aziendo kontrasto kon la kolor del fostan midi o maksi, i al gusto del kreator...

Kolores monokromes. El “ton sur ton”, ets...

El "New Look", el “déjà vu”.

De Brigitte Bardot a la grasia de Grace Kelly de los anyos 1950.

Tayores, jaketas de tafta, kon yaka klapa de botones shatafatlis.

Defilés diferentes, de los unos i de los otros, el uno mijor del otro, prezentandomos fostanes blankos i de organza.

Kolores pastel...

Las mankenes elegantes son los biblós de kapo di monte... sin duda...

Las fustas de tul komo tutú de balerinas...

Otros preferan la kolor blu Wedgewood, el romantizmo, ke aze akodrar la natura: el sielo, la mar klara...

La vistimienta kon tules, fiyongos, las pelerinas maksi, la flores kolor “rose bonbon”...

Las koleksiones pastorales me akodran los tablós del pintor Giovanni Boldini.

 

Keridos lektores,

Espero i vos sueto una enveranada agradavle, profitando i gozando de las ermozuras...

 

 

Siz de yorumunuzu yapın

Tüm Yorumları Görün