“El sol” despues de la “Tempesta”

Silvyo OVADYA Judeo-Espanyol
21 Nisan 2021 Çarşamba

Esto eskrivyendo este artikolo diya de Alhad, porke komo estamos en kaza i no tenemos la posibilidad de salir ofisialmente a la kaye tenemos mas muncho tyempo para las aktividades kulturales. Mas muncho tyempo si no partisipamos a los zoomes organizados.

  “El sol” es la vida sin maskas ke vemos en las fotografias de las plajes de Tel Aviv. Reelmente devemos de felisitar los dirijentes de Israel por sus kapachedad. Ya savemos ke es un payis riko i solo kon las kompanyias de “Startup” (mas de los sesenta por syen de las  kompanyias de startup del mundo son fondadas en Israel i kreo ke el governo gana munchas paras de las vendidades de estas kompanyias). I el primer ministro gasto bastante moneda, merkando mas karo los vaksenes. Puedeser syertas personas pensan ke es un movimyento politiko para ganar las muevas eleksyones. No es emportante; el resultado es emportante. Vemos ke la mas grande partida del puevlo fue vaksinado i los diyas dalkavo, el puevlo Israelyano no mete mas las maskas i todos estan en las plajes de Tel Aviv. No solo de Tel Aviv. En todas las plajes i las pisinas del payis. Kreo ke no se van a kedar repozados i en unas kuantas semanas van a empesar a viyajar. Espero ke esto todo no va a embatakar la situasyon.

   No tenemos las mizmas kondisyones en Turkiya. Tenemos una populasyon 9 vezes mas muncho de la populasyon Israelyana. I no es muy fasil de topar 130 milyones de vaksenes para eskapar esta bela. Ya savemos ke estamos bivyendo un problem politiko kon la China sovre los turkos de Uygur. I los chinesos dyeron karar de no embiyar mas los vaksenes a muestro payis. Agora muestros dirijentes estan en kontakto kon los Rusos i keren merkar el vaksen Sputnik. Los Evropeos i los Amerikanos no keren ke el vaksen Sputnik sea achetado por el Sentro Evropeo de Sanedad.

   I el famozo CEO de Pfizer el Sinyor Albert Bourla, dyo una deklarasion dizyendo ke este vaksen se deve de repetar kada anyo. I este modo kreo Pfizer va ganar bastantes paras kon este vaksen. Esto va ser komo el vaksen de grip. I kada anyo mos vamos vaksinar.

   En un o dos mezes mos vamos ir a la Ada. Esperamos ke vamos a bivir un enverano a lo manko komo el anyo pasado. El enverano pasado fue un mirakolo por los ke estavan en las Adas. I no vimos kavzos emportantes. El anyo pasado estavamos pensando ke todo se va eskapar asta este enverano. Ma no fue esta manera. Bivir i ver.

   Eskrivyendo este artikolo estava sintyendo el program zoom de Alef ande Hayim Pinto estava azyendo un reportaje kon İzzet Pinto ke es muy famozo i su echo es de vender los dizis turkos al mundo entero. I a la fin de esta konversasyon avia una propozisyon de los dirijentes del Alef. Ay mansevos ke tyenen ideas para krear muevas kozas, mizmo kompanyias de startup. I les propozi de prezentar una lista a los enteresados. I kreo ke munchas personas ke pueden ayudar estos mansevos van a estar prontos para ayudar i despues para ganar. Este modo munchas personas van a pueder progresar.

   Todo esta trokando en el mundo. Mizmo el mundo ekonomiko esta trokando. I oy en diya mizmo los echos estan tomando un aspekto diferente. Muestro dover deve ser de ayudar los mansevos talentuozos.

Muestro payis i muestra komunidad kon sus mansevos pueden realisar muevas kompanyias de startup si les damos una posibilidad.

Siz de yorumunuzu yapın

Tüm Yorumları Görün