La kerensya de inyetos es un sentimyento muy spesyal. Por las granmamas i los granpapas tomar los inyetos entre los brasos, kererlos byen, segir sus progresos, merkarles regalos, salir endjuntos a kaminar, ir al parko, kunarlos en la kuna son los momentos los mas emportantes i yenos de kerensya.
La kriyatura ke syente la kerensya de los grandes, granmamas i granpapas, el entereso ke les amostran i el amor ke les dan, esto influensa positivamente el kriyo de punta de vista sentimental.
Es un privilejyo tener inyetos i inyetas… En el siglo ke estamos bivyendo, komo las mujeres estan lavorando i tyenen munchas responsabilidades, estan dirijando grandes organizasyones emportantes, no keren kriyaturas. Eyas estan vyendo ke parir va ser un detenimyento en sus vidas profesyonales.
No van a pueder kontinuar al lavoro i solamente este penseryo es la fin del mundo para eyas.
La persona moderna esta entendyendo ke una vida sin kriyatura es un grande yerro, kuando se esta enviejesyendo i ya paso el tyempo. Esta realizando ke estan solos, sin fuersa, sin moral i tyenen menester otros para ke se okupen de eyos.
La kriyatura es una luz en kaza, es un sol ke briya i ke aze briyar al den frente. Es una boz, un bafo, una respirasyon ke mos da el sentimyento pozitivo para bivir kontentes.
La kerensya de inyetos es un grande moral para los aedados para detenersen a la vida. Los aedados ke estan engrandesyendo inyetos no tyenen depresyon.
La inyeta es un miraklo ke vino del paradizo, es una shans, es una okazyon para kererla byen sin limito i sin merikiya.
Kantarla kuando esta yorando, tomarla entre los brasos kuando tyene una dolor, afishugarla kuando esta hazina, es darle la mas grande afeksyon.
Es un plazer grande de tener estas djoyas entre muestras manos, eyos ambezan kualo es la kerensya a los grandes…
Tener ijos es una grande responsabilita, un amor ke no se puede eksplikar kon los byervos.
Dinguna roza no puede goler bueno komo los inyetos.
La kriyatura es un arvole, ma la inyeta es una roza ke nase en el arvole ke no mos puedemos artar de golerla.
Esto arrogando al Dyo, para ke todas muestras kriyaturas, inyetos i inyetas ke bivan en un mundo bueno, sin maldad, un mundo ermozo kon sanedad i kon felisidad…
