LA LUNA EN LA ANTIKUEDAD

Judeo-Espanyol
21 Nisan 2021 Çarşamba

İsak Eskinazi

La arkeolojiya mos amostra ke las personas paleoletikas es dizir las personas de la edad del ombre ke bivyo en las grotas komyendo las frutas de los arvoles, komyendo lo ke dava la tierra sin sembrar i arar, komyendo animales ke aferravan kon armas primitivas; se dieron kuenta de la egzistensya de la nosyon de diyas i de noches, kon el movimyento de la luna. Se puede dizir ke el tiempo se puediya konoser kon el siklo de la luna kon un ritmo syempre el mizmo de engrandeser i de enchikeser.

            Los freskos ke vemos en las grotas por muncho tiempo fueron enterpretados komo si fueran pintados para tener una kasa abundante. Oy los arkeologos dizen ke los mas de estos freskos fueron pintados para konoser mijor el movimiento de la luna durante el anyo. La dyosa Venus de Laussel es una figura de una mujer desnuda dando parto i tenyendo en la mano un kuerno ande se ven unas varas ke koresponden a la kantitad de lunas ke se ven durante un anyo. Esta figura esta en una roka ke se topa en Fransya, en la rejyon de la Dordogne i tiene mas de 27,000 anyos.

Aze mas de 2500 anyos ke bivyo el famoso filozofo Anaksagoras en Klazomeno, sivdad antigua ke oy se yama Urla, un kazal ke se esta azyendo famozo no porke aya nasyo este filozofo, porke esta rivalizando kon un otro kazal ke se yama Cheshme, un kazal ande los Izmirlis pasan el enverano. Este filozofo remarko ke la luna deviya ser una parte de muestro mundo de ande se aranko i se undyo en el espasyo dando sus tornos al rededor del mundo i del sol. Este filozofo fue tan famozo ke se dyo su nombre a uno de los krateres de la luna. En su tiempo fue egzilado porke diziya ke el sol i la luna no tienen nada de divinidad. El egzilyo no lo yevo muy leshos porke se fue a bivir a Lampsakos ke oy se yama Lapseki, un kazal en frente de Galipoli en Chanakkale. Anaksagoras diziya ke el sol deviya ser una roka entera de flamas, ke el briyo de la luna deviya ser el reflekto de la luz del sol, una konsepsyon ke fue konfirmada aze poko tiempo. Una otra koza ke tambien diziya, eran los eklipses del sol i de la luna.

Kon el tiempo a estas observasyones de la luna se adjustaron i las de las estreyas. Esto izo ke toparon lo ke yamamos la astrolojiya, i la astronomiya. A empesar ke los nombres de diyas se bazan sovre las estreyas: Lunes vyene de la Luna, Martes vyene de Marso, Mierkoles de Merkuryo, Djueves de Jupiter, i Viernes de Venus. Shabat vyene del Ivrit asentar, deskansar, no lavorar, meditar; Alhad del arabo “El vahid”, la unidad, el primer komo en Ivrit, ke los nombres de diyas se konosen kon números.

Los primeros a estudiar las estreyas fueron los papazes de Babel. Suvyendo a unas torres komo piramidas ke yamamos Zigurat en las yanuras de Mezopotamya, vyeron ke syertas estreyas i planetas teniyan un movimiento ke se trokava según las sezones. Komparando las pozisyones de las estreyas kon syertos animales i kozas, dandoles sus nombres izyeron una syensya de endevinar. Se aprovecharon de esto para dizir a los reyes de azer o no azer lo ke keriyan. Kon el tiempo esto se izo popular inkluzo oy en diya pasando de Babilonya a Misrayim, a Persya, a la Indya, a la Gresya i Roma.

La palavra astronomiya tiene su rais en la lingua grega kon las dos palabras Astro= Estreya i

Nomos= Ley. Esta siensya por munchos miles de anyos se mesklo kon la astrolojia. Oy klaro ke la astronomía no tiene dingun dariyaver kon la astrolojia. Los primeros dokumentos eskritos mos vinyeron de los Sumerios, de los Ejipsyos, de los Gregos de la antikuedad, i desde el siglo 5 antes de muestra era, ya saviyan ke el mundo no era yano ma redondo.

Así, todo empeso kon las observasyones del movimiento de la luna i kon la kuryozidad del ombre de saver i bushkar el “porke” i el “komo” de la kozas i vinimos a las siensyas de oy ke todaviya mos eksplikan muy poko sovre los misterios del Universo.

Los lavoros sientifikos profundos ke se kumplen kon grandes difikultades i devosyon mos azen bivir kon trankilidad i konfiensya en este mundo tan komplikado.

 

Siz de yorumunuzu yapın

Tüm Yorumları Görün