KOMO VA SER EL MUNDO DESPUES DE LA “CORONA”…

Şeli GAON Judeo-Espanyol
31 Mart 2021 Çarşamba

Keridos Lektores,

La epidemia del virus Corona, troko enteramente muestra vida de kadal dia. Kuando se va terminar? Komo vamos a pueder bivir?  Los futuristos tyenen unas kuantas ideas sovre la vida de despues del Covid-19.

En estos dias estamos realizando el grande trokamyento de la teknolojiya i de la siensya ke estan progresando a pasos muy grandes.

Esto provyene de la kriza global de la salud. Ma no savemos, ande ayegara este trokamyento…

El ministro de salud de la Almanya, mos esta dizyendo ke es imposible de saver lo ke va arivar en las semanas proksimas.

El astrologo i el fiziko fransez ke eskrivyo en los tekstos de “Nostradamus” en el 16en siglo, esta guadrando el misteryo de la demanda ke la China va okupar la Evropa kon esta epidemia ke estamos bivyendo en este siglo.

El Covid-19 tuvo munchos efektos sovre la sosyeta i la vida kotidyana. Todos estamos esperando ke seyga una perioda temporal ke va pasar.  No pueder salir a la kaye, los magazenes serrados, i la vida sosyal ke se ralentizo…

Puedemos pensar ke puede ser la umanidad tyene menester de ralentizar su vida?

- La Corona virus komo mos afekto?

Todos estamos preokupados. Algunos estan en panik de una manera paralizada i no saven kualo van a azer… Jeneralmente tomar el virus, hazinearmos, enfektar muestros keridos i al lado de estas preokupasyones el estado en syerto mos esta yevando al pesimizmo. Devemos de protejarmos. Por egzempyo, oy en dia kuando estamos salyendo a la kaye, no kale estar en los lugares ande ay muncha djente, kale lavarmos las manos kada vente puntos, kale ke agamos atansyon al lugar ande estamos tokando.

El espanto de la muerte mos esta azyendo una panik tanto grande ke, los problemes estan pujando.

No kale olvidarmos ke la panik se propaja mas presto del virus Corona. Estamos vyendo en algunos ke estan peryendo la esperansa de bivir, estan en la depresyon, la intolerensya esta pujando, se estan inyervando a bavajadas, i otras kozas…

No savemos si los efektos de este proseso seran permanentes.

Las pandemias kavzan las travmas psikolojikas.

No savemos ke karar va sureyar esta pandemiya… Kualo va ser despues?  Siguramente ke la vida va trokar enteramente

Al lugar de bever un kafe kon una amiga, puedemos preferar de avlar en el telefon u en el internet.

Al lugar de ir al echo, puedemos kontinuar a lavorar de kaza komo lo ke estamos azyendo agora. Esta manera de lavoro es konvenivle para los patrones de los echos korporativos. No va aver grandes gastes en los buros.

Komo vamos a salir abash de estas preokupasyones?

Lavorar de kaza es un lukso ma kale ke no peryemos muestras uzansas.  Alevantar a la mizma ora kadal dia komo ir al echo, vistirmos, fardarmos i asentar en frente del komputer.

Empleyar la fasilita de la teknolojiya, tomar aver limpyo, ser aktivos…

Kale azer un poko de meditasyon i egzersizes de respirasyon para ke ayude a aklarar la sensya.

Ay munchos kursos online. Puedemos kontinuar un kurso ke mos enteresa, para ser mas produktivos.

Syenteremos el poder en muestras manos, “KERER ES AZER”.

Kale akodrarmos ke esta perioda va ser pasajera. Estamos gerreando kon este virus el mundo entero igualmente.

Kon la unidad i la solidaridad vamos a destruyir este virus i a la fin la umanidad va ganar kon el nombre del Dyo.

 

                                                          

Siz de yorumunuzu yapın

Tüm Yorumları Görün