En Gibraltar
El haroset se aze en Pesah para ke mos akodremos del chemento ke los esklavos judios de Ayifto empleyavan para konstruir las Piramidas. Este biervo Haroset tiene tanbien la mezma raiz kon arsiya en ebreo (kil) HRS. En la tradisyon ashkenazi el haroset se aze kon mansana, muez i vino kolorado. Los sefaradis lo azen kon datiles i pasas pretas. Ma la chikitika komunita judiya de Gibraltar, mete una piskita de polvo de una tuvla verdadera aryentro del haroset para tener un sembolizmo de las tuvlas de akel tiempo.
En Arizona
Arizona es el sentro del trigo por las matzas. Los hasidim de Brooklyn, se van a Arizona a merkar los trigos para fabrikar la matza porke el klima es muy apropriado para el trigo de la matza. Si el klima kontiene muncha umidita, puede kavzar una fermantasyon en los trigos ke no es konvenivle segun la tradisyon. En Arizona no aze muncha luvia, por esto les permete de merkar el trigo de aya kon trankilidad. Los hahames de Nueva York se van a Arizona kuando viene el tiempo, egzaminan bueno bueno el trigo kon atansyon i kuando estan konvensidos, azen la rekolta.
En Persia
Los judios de Persia tienen el uzo de aharvarsen unos a los otros kon sevoyas freskas. Azen todas las tradisyones en el empesijo del Seder, komo agua salada ke simboliza las lagrimas, ets. I kuando vino la sira de meldar “Dayenu” se aharvan kon sevoyas freskas ke simboliza los kirbaches ke komimos akel tiempo.
En Israel
En Israel se fiesta solo una noche de Pesah. En la diaspora se fiesta dos noches. Lo yaman “el sigundo yom-tov de la diaspora”. Este uzo se ampeso a pratikar antes 2000 anyos porke los de la diaspora estavan asperando konfirmasyon del haber de Yerushalayim ke ya ampeso la luna mueva. Diziyan ke los de afuera de Israel no puediyan saver el diya egzakto del empesijo de la fiesta.
En el Norte de la Afrika
En los payises del Norte de la Afrika azen una fiesta de Mimuna. Se apareja mil i una dulsurya, se apareja la meza i las kazas se avren para ke los envitados vengan a komer estas dulsuryas, para ampesar una primavera de diyas dulses. Aparte de esto a la meza meten un peshkado para sembolizar la fertilizasyon i un oro para sembolizar la rikeza.
Abraham Lincoln i Pesah
Abraham Lincoln muryo en Pesah. El 16. Prezidente amerikano fue matado en el diya de viernes 14 April 1865 ke koensidava kon la kuatrena noche de Pesah. Al diya, los Judios estavan tan tristes por la muerte de Lincoln ke se fueron a las sinagogas i kantaron imnos de dolyo i imnos de Yom Kipur. Los judios de la kongregasyon “Shearit Israel” de Nueva York meldaron al nombre de Lincoln una orasyon (probablamente Kadish) ke se melda solo para los Judios.
