Kon el fin del verano i el retorno de la karantina, estamos mas tiempo en las kazas. Les kero propozar tres serias de TV echos en Israel.
El primer es "Tehran". Es una seria de espionaje muy enteresante. Una espion del Mossad viaja en sekreto a la kapital de Iran. Tehran es su lugar de nasimiento tambien. La hacker de komputadora tiene el objektivo de dezaktivar el reaktor nuklear. Esta misyon tendra implikasyones para el Medio Oriente i el mundo entero. La seria es en ebreo i perso. Es una sezon i tiene ocho episodios, kada uno 50 minutos.
Mi segunda propozisyon es una seria romantika i komika. Lehiyot Ita (Estar Kon Eya) es una seria de 2013, ma muy simpatika. Izieron tambien la version Amerikana ke se yama “La beyeza i el panadero”. La seria konta la istorya de amor entre una supermodela internasyonal muy famoza i muy rika, i un simple panadero ke no tuvo la shans de ir a la eskola artistika por razones finansiales. La seria es dos sezones, 18 episodios en total i kada uno 30 minutos.
Mi tresera propozisyon es una seria muy mueva, sovre la gerra de Yom Kipur en 1973. Se yama en orijinal Sh’at Ne’ila (el tiempo de Neila) ma en Inglez es "Valley of Tears" (Vaye de Lagrimas). La gerra de Yom Kipur es muy importante en la istorya de Israel porke rezulto en un trauma nasyonal despues ke los soldados en la frontera de Siria fueron sorprendidos kon el atake. La seria eksplika la lucha de estos soldados asta ke mas soldados vinieron a sus ayudas. La seria es una sezon kon diez episodios de 45 minutos.
En los ultimos anyos, las serias i filmos israelis estan en moda i tienen muncho sukseso enternasyonal. Israel se ve komo una potensia emerjente. Si no lo vitesh, vos rekomendo tambien Fauda (Kaos), Shtisel, Rehenes, Kuando Los Eroes Bolan, El Espio. Penso ke estos son las mejores serias ke se deven de empesar a ver i olvidar un poko la pandemia ke troko toda nuestra vida i los ke akseptavamos komo normal.
