Diya de la Kultura Djudia Evropea (l)

Silvyo OVADYA Judeo-Espanyol
23 Eylül 2020 Çarşamba

Es en el anyo 2001 ke por la primera vez se organizo el mizmo diya kon munchas sivdades Evropeas el Diya de la Kultura Djudia Evropea. Kualo es el eskopo de esta organizasion? Es de pueder dar eksplikasyones sovre la kultura djudia al publiko, de pueder avrir las puertas de las sinagogas para ke el publiko tenga la posibilidad de pueder vijitar estos sitios relijiosos. Esto es una okasyon para pueder prezentar diferentes muzikas ke reflektan muestra kultura: muzika de kantes judeo-espanyol, kantes de sinagogas, muzika klasika ke tyene raporto kon el djudaizmo, muzika klasika turka ke son kantes kompozadas por kompozitores djudios.
Munchos anyos despues, muestros dirijentes preferaron organizar en una data diferente por ke el primer alhad del mez de septiembre no era una data muy konvenivle para muestra komunidad. Una grande partida de los miembros de muestra komunidad estan dainda en las kampanyas.
Los anyos dalkavo esta aktividad se esta organizando por un grupo de dammas; este anyo enkavesada por la sinyora Eda Levi en kooperasyon kon el Muzeo Djudio de muestra sivdad. El Muzeo esta muy kontente de esta aktivitad. Solo el anyo pasado 2.400 personas partisiparon en esta aktivitad ke fue realizada en el Muzeo Djudio i la Sinagoga Neve Shalom kon su Sentro Kultural.
 Este anyo ay mezes ke estan lavorando para realizar esta aktivitad. Ma a la fin dyeron karar de azerlo virtualmente. Sin salir a la kaye, sin venir al Muzeo. Es vedra ke el Muzeo va ser avyerto ma no para mil personas. Keremos mizmo organizar tures turistikos en Galata, mizmo un segundo tur sovre los Camondos el mismo diya, despues de midi. Va ser un tur ke va ser organisado por la primera vez. Kreo ke va ser enteresante. Avlando kon uno de los prezidentes de muestra Komunidad despues del konsyerto de las Estreyikas d’Estanbol ke kijimos realizar en la Büyükada ma ke no pudimos, me avia dicho ke puediyamos realisar este konserto en el Neve Şalom propajandolo en las medias sosyales i elektronikos. Vamos a ver lo ke vamos azer. 
 Vos kero dizir ke vash a pueder segir el filmo kurto de Enver Arcak sovre los Djudios Ankaralis. El nombre del filmo es: “Ermana”. Lo puedes segir solo 8 diyas.
 Vamos a tener syertas konferensyas i presentasyones ke se van a pueder segir un anyo entero en el sit del Muzeo Djudio.
 Vos konti un alay de kozas ma no vos dishe la data ke se va realisar este diya. Es el 25 de Oktubre.
 Vos va avlar la semana vinedera sovre las konferensyas i prezentasyones. Vos kero prezentar la ekspozision ke va tener lugar en el muzeo el mizmo diya i ke va turar 30 o 40 diyas. Esto va ser una ekspozision de fotografias del famozo fotografo İzzet Keribar sovre los Djudios de muestro payis: las sinagogas, las ovras i el puevlo Djudio.

 

Siz de yorumunuzu yapın

Tüm Yorumları Görün