Autor anónimo
Embiyado por: Jak Treves
Yo kreo ke los mansevos de oy no saven lo ke es una prostela… Muestras madres yevavan una prostela enriva de sus vestimientas para protejarlas; porké no tenían muncho de vistir. En realidad, era muncho mas fasil de lavar una prostela, ke era de kotón, ke de lavar un fostán, una bluza o una fusta… Aparte de esto, la prostela servía para kitar los platos kayntes del orno.
La prostela de la mamá servía también a sekar las lágrimas, i mizmo a alimpiar la kara de las kreaturas. Kuando vinían djente a vijitar, las kreaturas mas averguensozos, pudían topar refujio detrás de la prostela de la mamá… De ayí es ke dizen: “Guadrarse en las aldas de la madre”.
En días de frío, la mamá alevantava la prostela para kuvijarse los ombros. I kuando era kalor, se alimpiava la sudor de la kara kon eya.
Las madres se servían de la prostela para trayer los guevos freskos a kaza. I podesh indivinar, komo la mamá trayía la lenya para kemar? Ariento de su prostela! I las ke tenían una guerta, metían las vedruras ke arankavan en la prostela. Kuando merkavan mansanas, peras, muezes i otras frutas, es en la prostela ke las yevavan.
Al mediodía, la mamá yamava sus kreaturas ke estavan djugando en el kampo o en la kaleja, ke vengan a kaza a komer porké la komida ya está pronta, en ajitando su prostela komo una vela.
I si viniya alguna vijita apasiz, el polvo de kuantas kozas pudía ser alimpiado kon la prostela!?
Solo de pensar la kantidad de mikrobes ke pueden akumularsen en una prostela, mos puede kitar lokos! Ma la realidad es ke la sola koza ke las kreaturas pudían apanyar de una prostela, era EL AMOR DE LA MADRE!
Oy en día, kon la teknolojía tan adelantada, no podemos amostrar ke la djente enventaron una koza ke pueda rivalizar la prostela!
