"La Ventoza" de Masada

Adaptado i adjustado del artikulo de Megan Sauter.

Judeo-Espanyol
28 Temmuz 2020 Salı

İsak Eskinazi

 

En las Olimpiadas ke se izyeron en Rio de Janeiro en el anyo 2016, los espektadores remarkaron ke el famozo nadador, Michael Phelps, ke obtuvo la medaya de oro, tenia en su espalda markas redondas. Estas markas kedaron de las ventozas ke le metyeron antes de nadar. Las ventozas son una forma de melizina ke aze miles de anyos ke fueron utilizadas. Michael Phelps kon las 8 medayas, rompyo el rekor de Mark Spitz ke tuvo 7 medayas.

En 2009, en Masada enkontraron una Ventoza ke fue empleyada aze mas de 2000 anyos. Ventozas en forma de kampanas se empleyaron muncho en Israel antiguo komo tratamyento medikal. Las primeras ventozas ke savemos, las enkontramos en el papirus de Ebers, un dokumento medikal de Misrayim, ke aze 3500 anyos, ande diziya ke para kurar las dolores  metiyan las ventozas kayentes ensima de la parte ke doliya. El dokumento de papirus tomo el nombre del profesor aleman Georg Ebers, el ejiptologo ke en 1874 dió este dokumento a la libreria de la Universita de Leipzig, ande el ensenyava.

Yo me akodro ke mi nona, (ke este en Ganeden) metiya una mecha ke kemava en mi espalda i ensima de la mecha, la ventoza de vidro. La mecha kemava asta ke no kedava oksijen aryento de la ventoza, i esta mankura de oksijen aziya ke la sangre suva asta el nivel del kuero ke se aziya korolado. Es en este nivel ke la dolor se kalmava i se kurava. Esta forma de tratamiyento lo eskrivyo tambien el famozo Hipokrates, ke todos los doktores djuran sus djuras para ser buen doktor i kurar hazinuras desde  kaji mas de 2000 anyos.

La Ventoza de bronze de Masada fue enkontrada en el nivel de la destruksyon de la fortaleza en el anyo 73 kuando los Romanos venseron a los Djudyos. Fue Yigal Yadin ke enkontro la Ventoza kon algunas monedas de akel tyempo. Aviya 2 formas de utilizar la ventoza: la seka i la umeda. En la formula seka la ventoza se kayentava ensima de una flama i kon un poko de azete se metiya ensima la espalda de la persona ke estava hazina. Kuando la ventoza se yelava, la mankura de ayre formava una presyon i aziya suvir la sangre. En la formula umeda, aziyan una chika ensizyon i la ventoza kayente se metiya ensima de la ensizyon i kuando se yelava de la mizma manera la sangre suviya al kuero. Este proseso deshava por un sierto tiempo markas en el kuero.

Es interesante de saver ke mizmo oy en diya, en munchos payizes utilizan ventozas komo medisina komplementarya.

 

Siz de yorumunuzu yapın

Tüm Yorumları Görün