Bamidbar

Rav Yeuda ADONİ Köşe Yazısı
8 Haziran 2016 Çarşamba

Despues de la salidura del Ejipto, i ke ya se kompleto el Tabernaklo, (Mishkan) ya era el tyempo de formar a el puevlo ke fue 400 anyos esklavo, komo un puevlo organizado, i tambien aunado.

Ke manera puediya devinir un puevlo ke fue anyos esklavo a un puevlo endependyente? La demanda ke demando Paro a Moshe Raenu en la salidura del Ejipto fue ken i ken vaja salir? La repuesta de Moshe Rabenu fue el puevlo entero. Nuestros mansevos i nuestros vyejoz. Nuestros ijos i nuestros ijas. Kon estas palavras Moshe Rabenu kijo dizir nozotros semos un puevlo.

En la perasha ‘Bamidbar’ meldamos ke El Kriyador enkomenda a Moshe Rabenu de kontar la kuenta de el puevlo Djudyo, El sinyor de Rashi puja sovre este sujeto dizyendo: “De la estima e tyene El Kriyador por el puevlo Djudyo syempre kere saver la kuenta. Kuando salyeron de el Ejipto los konto. Kuando muryeron en el pasaje de el bezero de oro por saver los ke kedaron los konto, i kuando se termino el Tabernaklo i pozo su divinidad sovre el puevlo los konto por saver la kuenta de el puevlo”. Dizen nuestros savyos ke El Kriyador no kijo pozar su divinidad ni sovre las mares ni sovre las montanyas, si no en el dizyerte de Sinay ke era el monte mas chico. Por enbezarmos ke es muy enportante de seer umilde. I la veluntad de El Kriyador es de seer nozotros umildes komo un dizyerto, estonses la persona puede deprender La Tora.

Ansi eksplika el savyo Rav Hida bendicha memorya, zehuto yagen alenu.

La dadiva ke se dava al santuvaryo medyo shekel, senbolizava a la persona ke se konsedira ke el ainda es medyo deve de azer esforsos por komletarse en el estudyo de La Tora, i en sus kualidades.