La piedrita de mi amigo Herman

Silvyo OVADYA Köşe Yazısı
1 Haziran 2016 Çarşamba

Lunes dospues del telefono del prezidente Ibrahimzadeh, me ambezi la muerte de mi amigo Sami Herman. Amigo ke lavorimos endjuntos kreo serka de kuarenta anyos. Sami era mi primo porke su madre Ester era la prima de mi granmama Profetta de Broussa ke bivio dospues en Paris. Komo eramos paryentes me akodro una o dos vezes ke los vijitimos en kaza kon mis paryentes i la Bar mitzva de Sami ke fue fiestado – o el pranso era dia de alhad – en su kaza de enverano en Caddebostan. Era elevo en Saint Michel, eskola renomada ande se ensenyava en fransez. Dospues estuvimos en la mizma eskola, Saint Benoit malgrado ke era sinko anyos mas aedado de mi. Muestra eskola era famoza kon los elevos ke djugavan un futbol dezmazalado kon una bala chika, kolor roz fonse i la mas grande partida de los elevos koryendo kon los botones atados de la djaketa serrada i Sami era uno de los ke djugavan futbol entre las dos lisyones. Dospues tuve la posibilidad de ver a Sami kon Süzet flortando kuando eran mansevos. Komo Suzet morava enfrente de mi kaza, tenia la posibilidad de verlos kuando salian o tornavan de pasear.

Es en la segunda mitad de los anyos ‘70 ke empesimos a lavorar en siertas ovras kon Sami. Es en el anyo 2002 ke tomo mi dover de Prezidente en el Fakirleri Koruma. Dospues lavorimos endjuntos entre los anyos 2004 i 2010 en la prezidensia de la Komunidad. Era el vise prezidente de la komunidad i reelmente tuvimos una kolaborasyon muy fruktuoza. Sami era muy piadoso i keria ayudar a todos los ke tenian de menester. No solo materyalmente ma keria ayudar a todos en topando echos, remedios a sus hazinuras, ets. Kuando se iva al kal, demandava el hatir de munchas personas. I si no se iva una partida demandavan al gabay o al prezidente del Kal de Ortaköy “ande esta Sami?”.  No azia diferensia entre un riko i un prove; todos eran igual.

El fue prezidente de muestra Komunidad entre los anyos 2010 i 2013. Lavoro para azer lo mijor. I reusho.

Sami era muy atado a su mujer Süzet. Ya se ke kada marido es atado a su mujer i kada mujer a su marido! Ma de vez en kuando vesh un marido -mujer i dizish: “fueron kriados el uno para el otro”. I era este modo para Sami i Süzet. Era un padre ke amava muncho sus kreaturas i sus inyetos. Era orgolyozo kon los estudios i la edukasyon de su ijo ke estava en el mizmo echo.

Sami era un buen ombre de echo. Munchos mansevos i mansevas tuvieron la oportunidad de lavorar kon Sami i se ambezaron munchas kozas sovre el komersio. Oy, diya de martes, en el diaryo Hürriyet, estamos meldando un avizo ande dos de estos mansevos (Hayim Pinto i İzzet Saban) estan rengrasyondo a Sami por el kamino ke les aklaro.

Ya puedo dizir munchas otras kozas sovre Sami. I kreo lo mas son kozas pozitivas.

Kero terminar en ogurando pasensya a Süzet i su ija Etel i a su ijo Melih. Ke su alma repoze en Ganeden.