EL PASAJE POR LA MAR RUVYA
El puevlo Djudyo en estando en la sivdad nombrada Sukot, les apronto el Kriyador de una manera milagroza dos pilares; uno de fuego i uno de nuve ke iva adelantre de eyos. El pilar de fuego iva kon eyas la noche por arelumblarlos i el de nuve iva el diya por amostrarles el kamino. El segundo diya, diya de 16 Nisan enpeso a kaminar delantre el real, el pilar de nuve. İ el puevlo se fueron detras de el, i pozaron a los kavos del dizyerto.
El Dyo Santo le enkomendo a Moshe Rabenu ke se tornaran atras de este kamino i ke apozen entre la mar ruvya i la forterisa de esta sivdad del Ejipto i las Djudyos izyeron ansi. Arivando a este luguar, se topa el puevlo en un estado muy perikoloza. El rey del Ejipto, vyendo ke los Djudyos tornaron de nuevo a este luguar pensa ke estan mareyados en el kamino, i no saven por ande ir i vinir. İ olvidadose Paro de todos los males ke pasaron por su kavesa, se arepintyo de lo ke izo deshar ir a los cudyos de su tyera, i pedrer tantos esklavos.İ arekoje una armada muy fuerte, i va presigir a el puevlo Djudyo. İ los alkansa en este luguar, en el sejen diya ke salyeron de Misrayim. Alora se topa el puevlo Djudyo en el mas grande dezespera i no save lo ke azer.
Pero, el Todo Poderozo ya save lo ke aze. El le dize a Moshe Rabenu ke diga a el puevlo Djudyo ke no se espanten i ke enpesan a kaminar sovre la mar. İ tu le dize a Moshe Rabenu ‘espande tu mano sovre la mar i partila i ke kamine el puevlo Djudyo por la mar komo si fuera en tyera’.
Moshe Rabenu izo el komando del Kriyador, El Kriyador apareje un ayre, se seka la mar komo si fuera tyera. En el empesijo de la noche setene en el 21 Nisan entraron los Djudyos dyentro la mar i pasaron por ayi myentres la noche entera, kaminando komo se kamina por la seko.
