Şemini

Rav Yeuda ADONİ Köşe Yazısı
30 Mart 2016 Çarşamba

El santuvaryo es el korason de el puevlo Djudyo, el sentro de la vida spiritual de los fideles. En el santuvaryo nos rankontramos kon el Kriyador. Ansi la sinagoga es el luguar onde nos arekojemos la kollektivita por sirvir i orasyonar a el Todo Poderoso.

En azyendo el sirvisyo a el Sinyor de el Mundo es ke estamos enfrente de el i denusyamos las orasyones. Sertemos nuestro korason. El nos responde a nozotros.

Ayi vemos ke se topa la divinidad. El de las alturas vyene a rankontrarse kon nozotros. Ansi ke nuestras orasyones suven a los syelos. La luz ke abasha direktamente de los syelos a el santuvaryo, akeya luz mizma aze suvir a nuestras demandas a el trono de su santedad. El nos manda una eskalera i nozotros suvimos kon esta eskalera.

En el santuvaryo egzistiya atkuendos i objeto; la meza onde se topava los panes ‘Lehem apanin’ i la menora, la almenara de oro. La meza sembolizava el mantenimyento de el ombre, i la almenara la kultura de el puevlo. La kultura cunto el mantenimyento forman la vida de el ombre. Dunke el santuvaryo da su luz la santa a kada persona i persona.Los sirvidores de el santuvaryo son los saturd (Koanim). Eyos apartyenen a el puevlo Djudyo. En la perasha de Shemini vemos el estrenamyento de el tabernaklo se realizo kon sakrefisiyos, ke se ayegaron syete diyas. Los diyas ke abasho la Shehina, la divinidad del santuvaryo.

En el ochen diya yamo Moshe Rabenu ,Aaron su ermano ke era Koen Gadol, i a sus kuatro ijos. Vayidom Aaron. En este estrenamyento Aaron Akoen piedre a los dos ijos Nadav, Vaaviv. Aaron Akoen no avla ni un biervo. La kayades, dizen nuestras savyos la kayadez de Aaron fue ke resivyo el cuzgo de el Kriyador. La kayades es una koza grande. Si un biervo vale una lira, la kayades vale doz.

En este mundo el ombre deve saver kuando va avlar i kuando deve estar kayado. Ansi gana su salud.