BO

Rav Yeuda ADONİ Köşe Yazısı
13 Ocak 2016 Çarşamba

Sigun konta en la perasha de la semana pasada en el enterval de un anyo, mando el Dyo dyez yagas una mas fuerte ke otra a el Ejipto.

Enprimero se trokaron las aguas en sangre, i muryeron los peshkados del riyo. Despues se muchiguaron en el riyo, las rana ke salyeron de las aguas i kavzaron munchos danyos en la tyera. I se konkriyo piyojos muy danyozos. I se ve unos animales krueles. I uvo una muerteldad en las kuatropeas ke izo muncho danyo. Una fuerte sarna le vino a todos los Ejipsyanos asta no pueder suportar. I uvo un buen pedrisko ke danyo todos los frutos del kanpo.

I en la perasha ‘Bo’ de esta semana meldamos la kontinuasyon de las yagas ke son la langosta ke baryo todo lo sembrado.

Despues les mando el Dyo una fuerte i espesa eskuridad ke turo tres diyas i tres noches de una manera ke los izo kevrantar muncho, syendo no se puediyan meneyar kada uno de luguar. Todos estos males fue suportando el kruel Paro entre de estar en su kapricho i no mandar a los Djudyos de su tyera.

Kuando se apezgava la fortaleza de la yaga sovre el i su puevlo, ya paresiya ke iva ablandar su korason, i ya prometo de dar la libertad a los Djudyos. Apenas kalmava la yaga i teniyan poko repozo, se enduresiya su korason. De esta manera suporto Paro i todo su puevlo estas mueve yagas myentre ke todos los Djudyos, estando mismo mesklados kon Ejipsiyanos no teniyan ningun mal.

La dyezena yaga (makat behorot) no pudo suportar asta el kavo, despues de sufriyir bastante ke todos los ijos mayores (behorot) de los Ejipsiyanos, de chico asta grande, fin el ijo de Paro, muryeron todos de uno en la medya noche. I fue forsado Paro de parte su puevlo de yamar en akel momento a Moshe i a Aaron, rogarles ke salyeran eyos i todos los Djudyos del Ejipto, i ke rogaran por su vida.

En la medya noche del 15 Nisan de este anyo, mando a dizir a todo el puevlo Djudyo ke se topavan en la tyera de Goshen. Ke eyos eran liberos i ke puediyan salir de su pais. Los Djudyos ke ya estavan prontos esperando esta ora, se rekojeron todos kon prisa en Ramses. A la manyana en el 15 Nisan, salyeron todos los Djudyos del Ejipto kon grande koraje i alegriya de aver estado en el Ejipto 210 anyos.

La suma del puevlo ke salyeron del Ejipto era 600 mil almas de ombres de 20 anyos i de mujeres i kreaturas.

Los Ejipsiyanos konosyendo a los kavos la grande encustisya ke kometyeron kon los Djudyos, i tambien ke vyeron ke ay Dyo en los syelos, ke paga a kada uno sigun sus echas, kijeron afalagarsen un poko kon eyos, i fueron regalandoles muncha plata i oro i pyedras presyozas, i munchas kozas valutozas. I les aziyan demandar todo lo ke teniyan menester. Ansi salyo los Djudyos de Mitsrayim kon muncha rikeza sigun se lo prometyo el Todo Poderozo a Avraam kuando le avizo lo ke teniya ke arivar a sus ijos. Komo esta eskrito en el livro Bereshit Kapitalo 15; “I disho a Avraam, saver sepas ke tu semen sera peligrino en tyera ke no es suya, i los aran sirvir, i los afriyiran. I tambien a la cente ke los izyeron sizrvir cuzgare yo, i despues de esto saldran kon ganansya grande.