Del Moshav Zekinim al Oryom

Silvyo OVADYA Köşe Yazısı
2 Aralık 2015 Çarşamba

Kuando devo de eskrivir dos artikolos una para el Amaneser i el otro para el Şalom, de vez en kuando tengo problemes de topar un sujeto mizmo kon ayres si en mi artikolo del Amaneser eskrivi ke teniya munchas ideas para eskrivir diferentes artikolos.

Este artikolo ke se esta eskriviendo noche de lunes dospues de un mach de futbol muy emportante entre Fenerbahçe i Trabzon. Un ekipo de una sivdad ke se topa enriva de la Mar Preta ke la yamamos “Karadeniz” en turko. I orozamente la ekipa de Fenerbahçe gano el match. (2-0). I agora es el lider de la liga. No vos pareska ke todos los djudios son partizantes de este ekipo. Siertos son partizantes de Galatasaray o de Beşiktaş. Kon el mach de esta noche, Fenerbahçe kon su viktoya se izo el lider de la liga; espero por una perioda larga ma esto puede turar mizmo una semana. Agora ya savesh mi kolores.

Esta semana vos kero avlar sovre el Oryom ke es un azilo para los miembros de muestra komunidad. Teniyamos el Moshav zekinim (İhtiyarlar Yurdu) ke se topava en Hasköy ande se topava la eskola de la Aliansa para los ijos ande estudio mi granpapa (el padre de mi madre), Profetta ijo de Avram Profetta ke era shastre i alkilava smokines i frakes en este kuartier. Mi nono me kontava ke alkilavan diya de Shabat por un muerto kristiano (ya savesh ke el muerto kristyano es vistido durante la seremoniya en la iglesia) i el mizmo smokin era portado por un novyo djudio. Munchos anyos el sinyor Taragano, proprietaryo de la firma Horozlu azia el mizmo echo. I antes ke muestra komunidad sea rika tuve el mazal o el desmazal de vistir un bonjur del sinyor Taragano. No pensi si este smokin fue vistido por un kristiano muerte. Dospues kuando los miembros de muestra komunidad se izyeron mas rikos o hovardas empesaron a merkar o a azer kuzir smokines sur komand (azer kuzir sovre las mizuras del puerpo). Oy en diya ya puedesh ver los kosfuegros, el novyo i mizmo una partida de los ombres ke forman el kortej tienen el mizmo vistido, mizmo la mizma kravata o papyon.

Si avlamos del sujeto ke se deve de tratar en el Oryom tenemos personas aedadas, personas de mantalitad limitada i ombres ke tienen menester de una kaza – ke no son kazados o kitos o ke tuvieron problemes muy emportantes en el echo. En el empesijo; la fusion no fue muy fasil porke se topava en el Moshav Zekinim solo personas muy aedadas. Ma no era la mizma koza por el Barınyurt. Una grande partida era personas ke no teniyan la posibilidad materyal para mantener una kaza. Mizmo en la guerta fraguaron un muevo edifisyo para los mansevos. Tenemos mizmo personas ke no tienen el derecho de kedarsen en una kaza asemejante porke no son bastante aedados. Todos tienen el mazal de pueder ir al Ospital Or Ahayim sin pagar grosh. Kon el akordo entre la direksyon de la komunidad i del Ospital Or Ahayim todos los ke se van al Ospital no pagan paras para ser egzaminados o para ser operados. Es la fondasyon del ospital ke afronta todo el nesesaryo. Kuando damos donasyones a la Fondasyon del Ospital estas paras se gastan para los menesterozos de muestra komunidad. Devo de achetar ke no era la mizma koza anyos antes. El ospital empleava estos donos mizmo para mantener el Ospital. No se si era djusto o no. Ma muestro prezidente İbrahimzadeh penso ke esta moneda no se deve de gastar para el ospital. No se lo ke pensash; este ospital si es reelmente muy emportante para mantener muestra komunidad i los aedados. Vos puedo kontar ke era diridjente de la Fondasyon del Ospital Or Ahayim en los anyos 1975-79 kuando teniya solamente vente anyos. Munchos “patrones” eran diridjentes de esta fondasyon i el Gran Rabinato ayudava el Ospital porke no teniyan la mizma vizyon de oy. Munchos medikos Djudios lavoravan por muestro ospital, i la Komunidad ayudava el ospital porke no era posivle ke un ospital de una fondasyon o ke sierve una komunidad ke gane paras. Siertas personas deven de ayudarlos.

Dospues ke las dos ovras se unifikaron kreo ke mizmo los gastes se aminguaron. Oy en diya el Oryom no lavora dainda kon una kapasitad de syen por syen. Esperamos ke esto se va realizar solo kon las personas aedados i no menesterozos.