El Mez de Avril 1915

Silvyo OVADYA Köşe Yazısı
29 Nisan 2015 Çarşamba

La semana pasada teniamos la selebrasyon i la komemorasyon de dos evenimientos ke tuvieron lugar siyen anyos antes en el İmperio Otomano.

El primer era la Gerra de Gallipoli. I el segundo los evenimientos ke se bivio en el Imperio Otomano kontra los Ermenis. La Gerra de Gallipoli  era muy emportante para el Emperio Otomano o lo mas muncho para el muevo estado turko. En el Simiterio de Acıbadem ke apartiene a la Komunidad de Haydarpaşa tenemos un alay de tombas de soldados djudios turkos ke piedreron sus vida en Çanakkale. Eran sivdadinos Otomanos Djudios. Eran soldados del Imperio Otomano i dieron sus vidas para sus paiz: el İmperio Otomano.

Dia de alhad en el grupo de Ladinokomunita avia un artikolo traduizido por el sinyor Simon Geron orijinario de Turkia i ke bive en Sydney en Australia. El izo la traduksion de un artikolo publikado en el Jewish News por el djornalisto Sam Lipsky.

Antes la traduksion del artikolo esta eskrito: Desde la Gerra de Gallipoli en kada gerra avia Djudios en un lado i Djudios en el otro, serviendo sus patrias. Sin ke lo sepan puedian matarsen entre eyos. Esto es el regalo de la Diaspora kuando un puevlo se topa dispersado en todas las partes del mundo. Mi padre por egzemplo se topava en Palestina  kon los Otomanos al lado de los Alemanes komo interprete en la Primera Gerra. Yo fui un interprete en la Armada Turka al lado de los Amerikanos kuarenta anyos despues. Oy el Primer Ministro Australyano se enkontra kon el Presidente i el Primer Ministro Turko en un djesto de amistad i onor para los muertos. Sien anyos antes se harvavan. Estos kapos de estado forman parte de mi, veniendo de la Turkia i biviendo en la Australia. Las linguas ke avlan son las mias. Ensima de esto ay el nasimiento de Israel.

 El artikolo sigiente fue publikado en el Jewish News.

De Gallipoli a Israel

No ay fin a los programas sovre el Sentenario de Gallipoli de la fecha 25 April 1915. Esta gerra fue un dezastre para los alliados. Ma aki todos estan de akordo ke de esto nasio la Leyenda de ANZAC ke trucho la identidad Australiana. Pensando a este evenimiento me demanda dos kosas.

Komo es ke de la derrota militar se yega a la Kommemorasion Nasional i de ayi a la viktoria en un lugar komo Beer Sheva, el 31 Oktubre 1917, ke resivio menos rekonosimiento?

 Desho la repuesta a otros. Es una kestion ke deve ser preguntada en un tiempo kuando la Australia va mirar al siklo de los kuatro anios de la gerra, en la istoria de Anzac. Por sierto ay una konneksion entre Gallipoli i Beer Sheva. Lo ke se paso en Beer Sheva era el empesijo de la fin del Imperio Otomano ke dospues troko al Medio Oriente.

(Aki entra tambien mi padre ke se topava en Palestina. Nunka supe lo ke se paso ayi komo se murio kuando yo tenia dies anios. Se torno atras tuberkuloso. Las kondisiones aran malas en tiempo de gerra i derrota. Se fue a los sanatorios en Suisa i no pudo ser salvado, muriendo en 1947. Fue el presio ke tenia de pagar por ser un soldado en la Armada Otomana en Palestina. Una koza ke oyi komo chiko ke un Arabo salvo su vida.)

Israel se prepara para kommemorar la viktoria de Beer Sheva ande las trupas Australianas jugaron un rolo grande en la liberasion. Los Australianos se van a ir ayi en dos anios i medio. Para İsrael l 31 Oktubre 1917, reprezenta el Sentenario de la Deklarasion de Balfour. La konneksion entre las dos fechas konta muncho. “Norman Rose” en la biografia de Weizmann, konta komo el diplomato Sir Mark Sykes trusho la letra a Weizmann adresada por Lord Rotchild. Estava eskrito ke Weizmann es un bebe. La reaksion de Weizmann ke este bebe no le gusto en primero. No era lo ke esperava. Ma la istoria se avia echo. Dospues de yamar a su mujer Vera, Weizmann le annunsio a Achad Ha’Am  ke en esta noche el avia eritado el lavoro de Herzl. Este evenemento fue selebrado por los bailes de los HASSİDİM. Tres dias despues la Deklarasyon de Balfour se avia echa publika.

La Viktoria de Beer Sheva permetio al General Allenby a azer un attako i a tomar Gaza. Despues se dirijo al norte en direksyon de Yerushalaim el 11 de Disiembre 1917 ke kaia al primer dia de Hanuka en el anio 5678. Tenemos ke tomar kuento del fakto ke si avia una Kampania Britanika kontra los Otomanos o si la gerra no avia reushido i si los Turkos se avian kedado en Palestina asta la fin de la gerra, no iva aver el Mandato Britanniko. Si esto ni puedia aver un Estado de İsrael. Este evenemento permetio a los sionistos a eksplotar la Deklarasion de Balfour ke por la primera vez en 2000 anios, una nasion tan poderosa rekonesia la Soverania Nasional Djudia. I los Australianos kon sus tropas en Beer Sheva djugaron un rolo en la istoria Djudia  (Traduisido por Shimon Geron de Sydney – Ausralia – Orijinario de Turkia)

Kije, keridos lektores, darvos la posivilidad de meldar este artikolo ke esta analizando de una manera diferente la pozision de los Inglezes en el Medio Oriente, lo ke da un rolo diferente a la Deklarasyon de Balfour i la fondasion del estado Djudio. 

P.S. Kero rengrasiar el sinyor Geron ke me dio la oportunidad de publikar este artikolo ke traduizio.