Buena fiesta de Pesah

Silvyo OVADYA Köşe Yazısı
8 Nisan 2015 Çarşamba

La semana pasada era la Fiesta de la sivdad de Edirne i esta semana es la Fiesta de Pesah. Los djudios Turkanos mizmo si no son muy relijiozos – ay kada dia mas munchas personas ke observan el Shabath i la kasherut - son tradisyonalistos i la grande majoridad toman lugar en los sederes kon grande plazer. Se melda la agada de Pesah en ebreo, en djudezmo (kreo ke ay muy pokas komunidades ke meldan la Agada de Pesah en esta lingua) i los diez anyos d’alkovo, mizmo en turko para ke los mansevos entiendan lo ke sus avuelos sufrieron en Ayifto (Mısır). En las orasyones entender lo ke se esta meldando es muy emportante. La primera agada de Pesah fue traduizida por el sinyor Izidor Barouh – ke su alma repoze en pas – i dospues por otras personas; ma todos los livros de ley fueron traduizidos por un grupo enkavesado por la sinyora Ester Asa ke reelmente izo un esforso inkreivle para eskapar este echo de grande dimensyon.

Agora es la moda en muestra sivdad de azer muevas komidas mizmo en Pesah. Agora empesaron a azer pan kon arina de matsa. Mizmo tarama - uevos de pishkado – kon matsa en lugar de empleyar pan. Kualo van a topar maz? Kuando el Barın Yurt era el lugar ande se gizava las komidas kasheres del Turkish Airlines i ke la Sinyora Ceni era la reyna de la kozina (mutfak) topava kada Pesah komidas ke no se puede imajinar en Pesah. Mizmo los pransos de brit mila eran inimajinavles. Oy en dia las dammas ke kontinuan este arte lo azen kon grande veluntad mizmo si la kreasyon no es la mizma…

En mi chikez avia patiserias kasheres ande se merkava sharope (agua kon asukar i arientro siertos parfumes) i pitas en kada kolor kon parfumes diferentes. Serpil patiseria del senyor Bardavid – ke su alma repoze en pas - era la d’alkavo patiseria kasher. Kuando era presidente me disheron ke tenemos problem de kekes kasheres para Pesah kuando no egzistia mas la patiseria Serpil ke se topava en Şişli en frente de la meshkita; la kaye ke abasha a la avenida Sıracevizler. Era djusto. I dimos este derecho al Asil para los ayedados ande teniyamos una kozina kasher. Este anyo meldi dos vezes el Avizo del Bet Din ke fue publikado en el Shalom ma malorozamente no topi ande se vende kekes Kasher Lepesah. Kreyo ke las kazas de katering (no ay un biervo en djudezmo i puede ser so yo el primer a emplear este biervo para sinyifiar las kompanyias ke gizan komidas i azen servis a las kazas, a los ofisios o a las assosyasyones i ovras ke keren komidas o dulsuryas) estan kompensando esta nesesidad.

Muestra sivdad no tiene el mazal de tener botikaryos djudios ke venden todo modo de komidas djudias mismo kasheres. Kuando la mas grande partida de los djudios bivian en la Kula avia munchos djudios ke vendian todo modo de komidas. Ma dospues todos se izieron kebares i preferaron a azer echos sin muncho esforsos. Ma la majoridad no reusheron a ganar mas muncho por ke oy en dia los botikaryos son kapaches de ganar mas munchas paras ke siertos komersantes.

 Vos va kontar mas sovre Pesah kreo el anyo ke viene. Vos oguro una fiesta de Pesah alegre.