Dia Internasyonal del Ladino/Judeo Espanyol

Silvyo OVADYA Köşe Yazısı
24 Aralık 2014 Çarşamba

Keridos Lektores,

Esta semana vos va dar unas kuantas enformasyones sovre esta organizasyon ke esta organizada por el Sentro de Investigasyones sovre la Kultura Sefardi Otomana-Turka kon el apoyo de la Komunidad Judia, el  semanario Şalom, el Instituto Cervantes i el Muzeo de los 500 anyos.

Reelmente es muy emportante para mozotros de ver munchas personas ke partisipan a esta organizasyon. Esto insistiendo ke Estanbol es la sivdad la mas emportante en la Diaspora para la lingua i kultura del judeo-espanyol. Vamos a empesar este diya a las 11.00, el 11 de Enero. El dia se va terminar kon el konsierto de Estreyikas d’Estambol ke va tomar parte a las 5 de la tadre.

No se kualo es lo ke vamos a komer ma estamos aparejando komida sefaradi kon la famoza Ceni Franko. Todos la konosesh . Eya es una Cordon Bleu de la kozina Sefaradi. Ceni mizmo mos va azer una demonstrasyon de komidas sefardis. (para ke la komida sea mas barata)

Jojo Kohen kon sus anektodas mos va azer riir.

Pablo Asuero, direktor del Instituto Cervantes va avlar sovre la proteksion Espanyola de los judios en el Imperio Otomano.

Este dia vamos a topar la posibilidad de ver el filmo de Centropa sovre muestra amiga Güler Orgun.

Si no tuvitesh el mazal de assistir en el dia del Limmud en la eskola judia a la prezentasion de Anna, Süzet i Karen vash a tener la oportunidad de verlas de muevo i kantar la kantika ke prepararon ke se yama “Kantan las Sardelas”. Si mos distribuan las palavras va ser muy entretenido.

Este dia vamos a tener mizmo la posibilidad de oyer a Esti Saül kon una konferensia sovre el pintor i profesor Leopold Levy, i a Fani Ender ke mos va kontar su chikez.

El muzeo esta organizando una ekspozisyon de fotos de muestros nonas i nonos, para mozotros mizmo de muestros parientes. Agora me vino al tino. La ekspozisyon puede ser entitulada “Del dip del Baul”. Süzet Herman, la mueva star del djudezmo i pintora va ekspozar sus ovras i todo el revenido va ser para el Sentro Sefardi.

Kreo ke todos konosesh al eskrivano Mario Levi. Su livro dalkavo es entitulado “Pandispanya”. I vamos a tener la oportunidad de oyer a Mario Levi en judeo- espanyol.

Autores de livros en Judeo-Espanyol komo Klara Perahya, Rifat Birmizrahi, Fani Ender i Irvin Mandel partisiparan en sinyando sus livros para los lektores.

No es para azer pizmas a otros paizes o sivdades ma mozotros vamos a avlar, sintir, kantar, riir, ver filmos i mizmo komer solo en muestra lingua en judeo- espanyol…

Ya se ke todos keresh partisipar. Espero ke vamos a tener buen tyempo i ke mis ermanas Klara, Güler i Coya van a estar kon mozotros.

Para partisipar pudesh telefonar a Emel Benbasat T. 0212 231 92 82 / 0535 350 07 78 o puedesh embiyar 30.00 liras al kuento del Sentro Sefardi. Numero de kuento:

Sefarad Kültürü Asraştırma Derneği Garanti Bankası, Şişli Şb 152 - 6296956 IBAN: TR19 0006 2000 1520 0006 2969 56