Aazinu

Rav Yeuda ADONİ Köşe Yazısı
24 Eylül 2014 Çarşamba

Eskuchad los syelos las palavras ke esto avlando, i oyid las dichas de mi boka. Ansi enpesa la perasha de Aazinu; kon las palavras de Moshe Rabenu. Ansi Moshe Rabenu se aderasa a los syelos ke el estava serka de los syelos, por razon ke ya se aserko los ultimos diyas de su vida. Un poko mas el ya se iva aportar de este mundo materyel, i se iva ir a el mundo vinedera. Por esto kavzo enpeso, i se adereso a los syelos, i despues se adereso a la tyera. El tomo portestigos a los syelos i a la tyera. Si el puevlo Cudyo non va sintir los palavras de El Kriyador, no va andar es sus kaminos, los syelos i la tyera vana dar testimunyo por sus no buena kondukta. İ el eskapo ke Moshe Rabenu tomo por testigas para testimunyar la kondukta del puevlo Cudyo a los syelos i a la tyera, por ke son firme todo tyempo ke el mundo egziste. En kavzo ke el puevlo Cudyo no va estar korekto kon El Kriyador i kon su ley la santa estonses los syelos no vana dar las luvyas i las tyerras no vana dar sus produktos komo lo meldamos en la Shema. No va ver luvyas, i la tyera no va dar produkto. Nuestras savyos dan tambien otra razon sovre este sujeto. Kijo dizir Moshe Rabenu mirad a los syelos  i a la tyerra. Si eyos salen del orden del patron de el mundo. Los syelos syempre dan las luvyas i la tyerra su produkto i no trokan des sus naturas.

El mundo se sostyene por el merito de la ley, i de  el sirvisyo a El Kriyador, i sovre la bienfezensya si somos korektos en estas pilares sakros, egziste en el mundo pas i trankilidad. Bivimos sin espanto, vida repozada, la luz de los syelos es la Tora. Por el merito de La Tora egziste en el mundo el repozo. David Ameleh en el livro de Teilim dize: “El Kriyador nuestro sinyor, ke fuerte es tu nombre sovre el mundo. Tu das la ermozura a los syelos. Ansi da de tu ermozura a la cente. İ da de tu luz, a las enbezantes tu ley Santo. Por la boka de los chikitos i mamantes enforteses los simyentos de el mundo.” David Amaleh kijo dizir La Tora ke se enbezan los chikos i se syente de sus bokas, se sostyene el mundo. El Kriyador ke nos de la fuersa i la enerjiya de azer Teshuva kumplida. İ este Shabat ke es Shabat Teshuva, El Kriyador ke nos membre a nozotros i nos de vidas alarga kon salud buena.

Gemara Hatima Tova.