Mira yo vos esto dando a vozotros oy la bendisyon a kondisyon ke vaja avedeser las enkomendansas de El Kriyador.
En La Tora egziste 613 enkomendansas. Las 55 enkomendansas estan eskritos en la perasha ‘Ree’. Unas kuantos de las enkomendansas ke meldamos en la perasha de esta semana son de alesharmos de la idolatriya, las kozas ke son defendidos de komer, los doveres ke tenemos verso las personas, la enkomendansa de ayudar a los meneterozos. Ansi la meldamos en la perasha: ‘Kuando uvyere en ti menesterozo de alguno de tus ermanos, en alguna de tus sivdades, no endureskas tu korason, ni seres tu mano a tu ermano menesterozo, si no ke avrir avreras tu mano a el, i enprestar le enprestaras lo ke le basta, lo ke tyene de menester.
Solamente si eskuchar eskuchares a la boz de El kriyador tu Dyo, para guadrar, para azer todas estas enkomendansas ke yo te enkomendo oy. Por ke El Kriyador te bendizera komo te avlo La Tora nos avla tambien en esta perasha por las tres fyestas ke son yamada ‘Shalosh Regalim’.
Pesah, Shavuot i Sukot, ke estas tres fyestas devemos de alegrarmos nozotros nuestros ijos, nuestros ijas i azer alegrar a el Levi ke syerve en el santuvaryo, a el peligrino, a el guerfano, i la bivda ke estan bivyendo kon ti. İ te akodraras ke fuites syervo en Ejipto, i guadraras i aras estas enkomendansas.
Ya es savido lo ke es eskrito en la Gemara ‘SHABAT’. El idolatro ke vino a konvertirse onde İlel azaken, ansi le dize: “Lo ke no te plaze ke te agan a ti, tu no la agas a ninguno. Esto es La Tora entera. Agora puedes enbezarte La Tora entera.”
Estas palavras nos enbezan: Toda persona ke onora visto ke somos todos kreyados de parte de El Kriyador, onora i al Kriyador por ke es nuestro sinyor, i nuestro Kriyador.
