Naso

Rav Yeuda ADONİ Köşe Yazısı
15 Mayıs 2013 Çarşamba

En la bendisyon ke nos bendizen los Koanim, egziste sej(6) bendisyones. Ad… te bendiga i te guadre. Aga alumbrar Ad… su kara sovre ti i te engrasye. Alse Ad… su kara a ti, i poze enti pas. El Koen ke se topa serka el Kriyador, por kavza de su misyon ke es de ayegar sirvisyos (korbanot), siguramente, ke son resividas las bendisyones ke eyos nos bendizen. Komo es diço, persona ke es ojo arto es bendiço, tambien sus bendisyones son resividos. En el Talmud es diço, los malahim(anjeles) le dişeron a el sinyor de el mundo: “En la ley ke dates a el puevlo cudyo eskrive  por ke Ad… vuestro Dyo es Dyo de los dyozes, i sinyor de los sinyores. Dyo grande poderozo, i terivle ke no resive fases. Komo eskrivites en la bendisyon de los Koanim Alse Ad… sus fases a ti?” El Kriyador responde dizyendo, komo ke no alse mis fases sovre el puevlo cudyo? Yo les enkomendi dizyendo “vas a komer i te vas a artar i vas a bendizir a tu Dyo.” 

Ma mi puevlo malgrado ke komen kantidad de una azetuna, eyos no mankan de dizir Birkat Amazon. (la beraha de despues de komer) No ay mas grande kualidad en la persona de ser ojo arto ke esparte de la bueno ke el dyo el Kriyador a las ke poko tyenen. Ansi los Koanim ke bendizen de la bendisyon ke les dyo el Kriyador a el puevlo cudyo. En la bendisyon ke nos bendizen los Koanim a nozotros, prononsas dizyendo te bendiga el Kriyador i te guadre. El Kriyador bendize a los ombres. A ken le da sensya, a ken rikeza. El savyo tyene un entronpeso de tomarse gaava(grandeza) por su sensya. El riko tyene myedo de pyedrer su rikeza. Ma el sinyor del mundo no basta ke la da a la persona su bendisyon i lo guadra de toda manera de entronpesos. Despues ke meldamos en la peraşa las bendisyones ke nos bendizen los Koanim, para ke seyan resividas enfrente el Kriyador devemos ser prontos a resivir estas bendisyones. Sigun la enportansa ke damos a estas bendisyones, el Kriyador nos da a abondansa nuestros dezeos.  Nuestros savyos los bendisyones las asemejan a un riyo, el riyo onde topa syempre manodero de aguas.