BEHUKOTAY

Rav Yeuda ADONİ Köşe Yazısı
21 Mayıs 2008 Çarşamba

Si anduvyereş en mis fueros, i gudrares mis enkomendansas, i las azeras. Yo dare vuestra Luvya en su tyempo. İ la tyera dara su ermoyo. İ el arvol de el Kampo dara su fruto. İ komeres vuestro pan a la artura. İ morares siguros en vuestra tyera. İ dare pas en la tyera, i durmires, i no avra ken vos espante. İ por vuestra tyera no pasara espada. İ vos muçiguare, i afirmare mi firmamyento kon vozotros.

Kon estos versetoz ermozos enpesa la peraşa de Behukotay. Sigun Raşi para ke se realize estas promesas del Kriyador devemos estudyar la Tora i andar en el Kamino de la Tora.

Kuando una persona entra onde el rey por demandar alguna demanda separa delantre de el rey kon myedo i espanto. A la kontra si un lavorante entra a el palasyo por azer algun lavoro, el tyene su tino en el lavoro ke el va azer komo keno ay ningunos en el.

En el palasyo, otra manera no puede prosperar a azer su lavoro.

Ansi, el ombre ke estudya la Tora es ke esta azyendo el orden del Rey delos reyes el santo bendiço el. Komo dizen nuestros savyos: No ay mas grande libertad, mas ke el estudyo de la Tora. David Ameleh en uno de sus salmos en el livro de Teilim dize: Penso de azer alguna ovra, mis pyes me yevan a tu Karera. La eksplikasyon de estos byervos: Penso irme a tal luguar ma veyo ke mis pyes me yevan ael santuvaryo.

Kada ombre fue Kriyado, para inçir una misyon en este mundo de komletar lo ke mankaron otros. En mismo tyempo en inçendo sus doveres el ombre en este mundo deve de pensar i ayudar a los ke poko pueden. Komo meldamos en los perakim: Siyo no me okupo de mi, ken su puede enteresar por mi, kuando yo penso solo por mi, yo ke valgo? Custamente David Ameleh Kijo dizir, kuando me vo azer mis okapasyones personeles, mis pyes me yevan onde se topa la kolektividad si puedo ayudar a al guno ke esta en apreto.

Uno de los versetos ke meldimos en la peraşa: İ Komeraş vuestro pan a la artura, i morares siguros en vuestra tyera. En el Talmud dizen nuestros savyos.

Kome un tersyo, beve un tersyo, i repoza un tersyo. Si te ensanyas ke no te danye. Nuestros savyos Kijeron dizir: Si estas muy arto ipar azardo te ensanyates por algun partekular, te puedes danyar tu salud. La ravya, i la sanyo son una maldisyon para la persona. Komo meldamos en la peraşa de ki tavo, te dara el Kriyador un Korason ravyozo. Por esta Kavza dize en la Tora, vaja komer vuestro pan a la artura, no vaja tener ni ravya ni sanyo por ke el Kriyador va pozar su bendisyon sovre vozotros.