No se si lo savesh: serka kada semana el Museo Djudio organisa un torno djudaiko en Galata para ke la djente puedan konoser los sitios (sinagogas, edifisyos, konstruksyones …) djudios i konoser syertas kostumbres djudias. I ay syertos gias (rehber) djudios o no, ke lavoran para dar detalyos a los ke partisipan i son enteresados en estos sujetos. Kuando estava en Israel di una konferensya ke fue propajada en el youtube. Despues de este evenimyento un alay de djente me bushkaron dizyendo ke keren una konferensia asemejante en Estanbol. Les dishe ke no era la pena i era mijor de tomar el tur Djudio de Galata i vijitar el Museo Djudio; lo ke keria.
I syertos amigos me demandaron ke puediya ser esta data. Komo no es muy fasil de dar karar, a la fin fuimos de akordos por la data del 20 Oktubre. Ken estava kontente, ken no. Ma kaliya dar karar. El diya dalkavo un amigo disho ke no puediya vinir por ke devian de ir a un funeray. I avia prometido al museo ke deviamos de ser a lo manko dyes personas. I dishe a mi mujer “Ayde hanum mos estamos indo al torno Djudio de Galata”. I eya estuvo muy kontente de partisipar en este torno.
No fue muy fasil de topar un gia libero para ke mos aga pasear este torno. No era emportante si el gia era djudio o no. Keriamos ke sea bastante savido para kontarmos la istoria de los djudios i la istoria de las sinagogas. Los dos sujetos son bastantes kompleksos. I muestra direktrisa lavoro muncho para toparmos un gia. Ma es muestro amigo Mois Gabay ke mos ayudo. El sinyor Gani ke konose muy bien el Fransez i el Inglez mos konto bastantes kozas en la Sinagoga Ashkenazi. Mos konto syertas kozas sovre la Komunidad Ashkenazi, i syertas kozas ke se realizaron antes de la Engizisyon Espanyola. Mos konto sovre el Rabino Sarfati de Andirne i sovre los Djudios d’Andirne. Komo los Djudios vinieron en las tierras d’Anatolia antes los Djudios ke vinieron de Espanya i de Portugal. Mos konto syertas kozas sovre el mashiah falso, Sabetai Sevi i lo ke afito despues ke se izo musulmano.
En el empesijo no estava muy reposado porke era la primera vez ke estava en la kavesa de un torno ande los partisipantes eran Djudios de Turkiya. I kreo ke no estava muy kalmo porke estava kon eyos i estava pensando ke patranyas va kontar este benadam. I reelmente avli! ma a lo manko el vente por syen de lo ke se konto. Es djusto ke lavoro desde serka de sinkuenta anyos en muestra komunidad ma se komo devo de komportarme frente kon frente en este modo de situasyones. I ize lo ke puediya rezistir para no avlar antes ke el gia eskape lo ke devia de kontar. I este modo pudimos vijitar Galata. Malorozamernte no pude segirlo en el museo, porke devia de estar pronto unas kuantas oras antes ke el konsyerto empese en el oditorium de muestra eskola.
La semana ke vyene vamos a mostrar un filmo sovre las Bodas de Smirna. Vos estamos asperando…
