La semana pasada las eleksyones d’Estanbol i la pedrita del sinyor İsak Pinhas fueron tratados en estas kolonas.
Agora ke estamos en las islas tenemos munchas kozas para kesharmos. Mos puedemos keshar de las oras de los otobuses de mar, mos puedemos keshar de la suzyedad ke azen los kavayos en las islas i ay 30-40 anyos ke no reusheron a topar una otra solusyon, i mizmo ke ay munchas kazas ke no se alkilaron porke la sezon de las islas esta bastante kurta.
Ma ke no vos pareska ke el Otel del Anadolu Klübü esta vaziyo. Esta yeno todo el enverano i dingunos se keshan del presyo.
Mos puedemos keshar mizmo de los presyos de las zarzavates i de las frutas. Ya savemos ke en este siglo vamos a tener problemes muy emportantes sovre los produktos de la agrikultura. Los kampos no se estan ancheandos ma la djente esta pujando. Es un mez antes kuando estava en Seattle ke tuve la posibilidad de vijitar Microsoft i de ver lo ke estan azyendo para pueder kontrolar la produksyon en los kampos kon drones, antenas i un alay de programes para pueder kontrolar la produksyon. Reelmente es muy enteresante. Ma kreo ke los payizes rikos van azer esforsos para tener un rezultado mijor, ma los estados proves van abandonar los kampos de agrikultura para fraguar edifisyos sin pensar lo ke va afitar 30-40 anyos despues.
Ma vyendo estos tyempos dalkavo la Fransia (Paris), la Espanya (Barcelona), los Estados Unidos (Seattle) todos estan vendyendo muncho mas karo ke muestro payis. Kualo es la razon? Estan ganando muncho o reelmente es muy karo de kultivar... No se la razon, ma en el 21 en siglo el mijor echo es de kultivar los kampos kon una teknolojia alta. Porke este va ser la salvasyon de muestros ijos i inyetos. Esto va ser la salvasyon de la umanidad.
No devemos de olvidar ke la djente ke bive en el mundo va pujar kada diya ma los kampos ke puedemos kultivar no van a aumentar.
