Anyos antes kuando estava meldando las gazetas evropeas djudias meldava ke los Djudios de siertas sivdades asendiyan las kandelas de Hanuka en las plasas de las sivdades ande moravan kon el prezidente de sus munisipalidad i syertos responsavles del governo. I esto era un grande selo para mi. Ma no tuve el koraje de eksprimir este dezeo komo Ivo Molinas, el redaktor de muestro semanario.
I tres anyos antes, kuando kon el prezidente de la munisipalidad de Beşiktaş, el sinyor Murat Hazinedar, dimos karar de asender la Hanukiya debasho de la meshkita de Ortaköy, reelmento esto era una revolusyon para mi. I kero felisitar muestro prezidente, Ishak Ibrahimzadeh por su koraje. “Asender las kandelas de la Hanukiya en la kaye kon la djente endjuntos”. Esto fue el empesijo del miraklo. Munchos djudios de muestra komunidad ke pensan de esta manera ayer no estavan en Nişantaşı en el Park de los artistos (Sanatçılar Parkı). Porke este konsepto no es mas mirakolozo, es un konsepto ordinaryo (bayağı).
Ma esto no es dainda ordinaryo para mi. Ayer estava en el avion i despues en el aeroporto sin mi validja i despues me dyeron un papel hashabi porke un viyajador torpe me tomo la validja i se fue fina Brusa i torno atras. I koryendo vine a kaza ande sin suvir me fui koryendo al parko ande estavan organizando la seremoniya para la fiesta de Hanuka. En indome estava sintyendo la boz de Cenk Rofe kon el grupo Nes formado de dammas ke kantan en Judeo-Espanyol. Reelmente fue una maraviya de sintirlos debasho del Otel St. Regis. I aviya unos kuantos polises para asegurar la seguridad. I era reelmente un lugar siguro. I despues empesimos a asender las kandelas. Mas de dyes personas a kada kandela. I alkansimos a asender la Hanukiya kon mas de syen almas. A la fin todos estavamos kontentes. Djudios, Muzulmanos i Kristyanos. El Dyo ke mos ayege kada anyo de asender la Hanukiya. Hanukah Sameah.
