Ezitasyon antes de eskrivir

Coya DELEVİ Köşe Yazısı
5 Eylül 2018 Çarşamba

Dezde un syerto tyempo, esto es el problem miyo asentandome enfrente la komputadera. En meldando lo ke eskriven los amigos i amigas seya en el ŞALOM seya en EL AMANESER, me tresalgo de la diversidad, de la kualidad de los tekstos.  Mi grande esperansa es ke, en serka me vo eskabuyir de esta ezitasyon absurda…

Keridos lektores, al pareser ke ampesi a uno de mis moabetes... Bueno, anyos i anyos resivi la revista LOS MUESTROS ande meldava tekstos enteresantes. Vino tyempo, el Sr. Rahmani z”l, me avyo un Site al kual, regolarmente embiyi mis eskritas en JUDEO-ESPANYOL i mos korrespondimos. Oy, keridos amigos, desidi de mandar una konseja sinyada Matilda-Koen Sarano. Dunke, no tengo dingun merito otro ke azervos konoser este kuento enteresante ke se publiko en el No. 34 de Los Muestros.

Coya Delevi, 27 Augosto 2018.


EL PRESTIMO

Aviyan un Rav kon una Bulisa ke tenian dos buchukas. Un vyernes de Rosh Ashana, el Rav se fue al banyo, la Rubisa estava en kaza aprontando la meza. I las ermanikas djugando en la kaye. Paso un otomobil ke les dyo kon fuersa a las dos buchukitas i las desho embasho... La Rubisa las tomo, las emburujo i las metyo en la kama, i empeso a pensar komo se lo va dezir al Rav…

Apenas ke entro, el Rav demando por las ijikas i la Rubisa le disho ke estavan durmiendo i demando al Rav de asentarse… “Sinyor Rav, le vo demandar una koza: Avian dos vizinos ke eran komo ermanos. El uno resivyo una karta diziendo ke el padre muryo en otra sivdad i ke deve partir para azerle onor. El teniya una gaynika. Le disho al vizino: Tomala, miramela asta ke torno! I el amigo le disho: Kon grande plazer! Vate en buena ora! El se fue, la gaynika kedo en el vizino. El la estuvo mirando. Le dava la komidika, la aguika ets… La gayna empeso a engodrarse… El vizino merko un gayiko. La gayna empeso a parir guevizikos. De los guevos salyeron gaynikas…

El ke partio, paso los syete i le disheron: Aze i el mez… El kijo aresentar a su madre ke iva kedar sola. Paso un buen karar de tyempo. Kuando torno a kaza, fue ande el vizino, le demando la gaynika ke se la de, ke es suya. El otro le disho NO! Tanto tyempo no estuvites, le di a komer, le di agua , la engrandesi, ke akontesyo agora ke la demandas atras? I, los dos amigos empesaron a peleyar…  I El, SINYOR Rav, le demando la Rubisa, Ke dize? Esta gayna a ken apartiene? Al ke la desho u al ke la tuvo? Disho el Rav: El ke la tuvo la miro kon su buen korason. El ke la desho no la desho por  siempre. Le disho miramela asta ke torno. SinyorRav le disho la Mujer: El Dio mos desho EMPRESTIMO dos poyikas, i agora vino mo las tomo!

Este kuento fue kontado por Rashel Pereira en 1987 i arrekojido en Yerushalayim por Beki BARDAVID, z”l.

 

Siz de yorumunuzu yapın

Tüm Yorumları Görün