El empesijo del enverano

Silvyo OVADYA Köşe Yazısı
6 Haziran 2018 Çarşamba

Kuando vemos luvya, friyo i inyeve en los mezes de invyerno, keremos ver el sol i tenemos el dezeo de estar en el bodre de la mar. Ya savesh ke kada anyo los bayrames muzulmanos se aserkan de dyes dias. I este anyo vamos a fyestar el primer bayram de Ramadan empesando del 14 Julio. Para los ke son ovligados de lavorar, las dos fiestas son las datas ideales para azer unos kuantos dias de vakansas. Esta vez los dias ke mos vamos a la Ada troka. I mos vamos mas tadre a las islas.

En mi chikes, las eskolas se serravan a la fin del mez de mayo. I anyos se avriyan el 25 de septembre. I teniyamos kuatro mezes para azer nada. No es komo oy. Oy en diya los mansevos se van a los kampos de enverano, mizmo en el lise azen esforsos para ambezarsen diferentes kozas. En las Amerikas o en otros payises para ser achetados a las universidades, deven de azer syertos esforsos: lavorar para syertas asosyasyones, ser un lider de un grupo, mizmo si azes egzersizes de spor, es puedeser preferavle. Si djugas basketbol o futbol en un ekipo es maraviya …

Kon estos muevos sistemes, dospues de una syerta edad no es posivle de ver a los mansevos en las islas. Es solo las noches de Shabat ke vienen a ver sus paryentes. No se si es de la komida, del eskarinyo o de las kostumbres de los djudios!

Este anyo en el bayram, ay syertas personas ke se van a ir a las islas gregas. Los gregos estan asperando a los Turkos ke van a deshar paras, mizmo si el Euro esta muy alto para los Turkos. Ma dainda tyenen el poder de ir a las islas. Ay munchas personas ke se van a ir a los paises Evropeos. El Euro esta alto, el dolar mas alto ma no ay lugar en los avyones.

Los dos anyos dalkavo los lugares turistikos en Turkiya tenian munchos problemes para pueder inchir sus oteles. Este anyo vyeron unos kuantos rusos, iranianos i gurdjis i agora estan kon la gava porke vyeron ke tyenen mushteris para los oteles. Ma yo me va irme a un otel en Selimiye. Lo alavaron. I todos estan avlando de la ermozura de la mar. Kale achetar mizmo si vijitatesh munchos paizes en el mundo i si vitesh un alay de plajes vos djuro ke la mar la mas ermoza es la mar de Ege, la mar entre la Gresia i la Turkiya. Ke sea kon motores o yates o en las plajes, reelmente no es posivle de topar esta kualidad de mar en otros lugares.

Enveranada buena i buenas vakansas.