BEAR

Rav Yeuda ADONİ Köşe Yazısı
9 Mayıs 2018 Çarşamba

I avlo el Kriyador a Moshe en el monte de Sinay dizyendo: Avla a los ijos de Israel i diles: Kuando  vendresh a la tyerra ke yo vos dare, olgara la tyerra Shabat a el Todo Poderozo. Sesh anyos sembrarash tu kampo i sesh anyos apodaros tu vinya i akojerlas tu renuevo. En el anyo seteno avra Shabat de olgansa a la tyerra. Shabat a el Kriyador. Tu sembres tu kampo i apodes tu vinya. El Shabat de la tyerra vos sera para komer, a ti i a tu syervo i a tu syerva i a tu kuatropea, i a la bestya ke uvyere en tu tyerra.

El eskopo de todos las enkomendansas es de azermos akodrar, ke somos ovligados de ovedeser i afirmar las dichas de el Kriyador. En ovedesyendo la persona las enkomendansas del Kriyador, para myentes, ke el Santo Bendicho el podesta sovre el mundo entero. El ombre deve de saver, ke el patron de este mundo es el Kriyador de el mundo. En la bondansa no devemos de olvidarmos, la bondansa de onda nos vino? En afirmando los fueros i los djuisyos, damos loores a el Kriyador ke nos rengrasyo kon muncho bueno.

Kuando el Sinyor de el mundo nos da un kanpo, devemos de azarlo i sembrarlo komo esta dicho en la Tora. En arekojendo el produkto, de la tyerra devemos de deshar los bodres de el kanpo para los menesterozos lo ke se olvido en el kanpo mas no apartyene a el, sino para los menesterezos, no deve de tornar a tomarlo. No deve de olvidarse de aregalar a el Koen i a el Levi para ke tenga la bendisyon de Dyos.

La perasha nos enbeza todo lo ke es de menester de azer, para ke tengamos el merito de alkansar la bendisyon de el Kriyador, bendicho su nombre.

 

Behukotay

Si anduvyeres en mis fueros, i guadraresh mis enkomendansas i los azeres, yo dare vuestra luvya en su tyempo, i la tyerra dara su ermoyo, i el arvol del kampo dara su fruto i komeresh vuestro pan a la artura, i moraresh siguros en vuestra tyerra, i dare paz en la tyerra i dormiresh i no avra ken vos espante i are kitar las alimanyas malas de la tyerra, i por vuestra tyerra no pasara espada. Vos muchiguare i afirmare mi firmamyento a vozotros i andare entre vozotros. I sere vuestro Dyo i seresh mi puevlo. Yo so vuestro Kriyador.

La Tora nos esta enkomendando de aplikar las enkomendansas ke nos enkomendo el Kriyador. El Kriyador nos esta prometyendo ke nos va dar muestro mantenimyento syempre. Si andovyeres en mis fueros: son los primeros biervos de nuestra perasha. Kere dizir: Si vash a ser buenos i onestos i vos vash a enforteser en el estudyo de la Ley, vos va dar syempre luvyas de bendisyon. Tambien va pozar la pas entre vozotros ko ne digash ya tenemos un pan de komer i muncho bueno para la pas i el repozo nos manka. Por esta kavza vos esto prometyendo ke yo vos va a dar i la paz para ke tengash el repozo. Yo va estar syempre entre vozotros, no solamente en este mundo tambien en el paradiso. En este mundo nos va dar artura i repozo por ke estudyemos la ley santa, i la aplikaremos ansi ke tendramos merito de eredar el mundo vinedero. A mis enkomendansas guadraresh, este verseto nos embeza, dizyendo la ardor ke devemos te tener para aplikar las enkomendansas, dizyendo kuando me se va fadar de azer tala enkomendansa. Devemos de ser prontos en las enkomendansas i kuando va vinir el tyempo de azerlos si ninguna ezitasyon aplikarlas. Ansi vos va dar la luvyas en su tyempo, vash a tener syempre la bendisyon del Kriyador, vash a arekojer vuestro produkto. Entre estas todas bendisyones, el Kriyador va pozar mi morada entre vozotros. Yo va morar entre vozotros por el merito ke estash enfortesyendo la ley i afirmando mis enkomendansas, dize el Todo Poderozo. 

 

 

 

——————————————————————————————