La Hazinura de Muestro Siglo

Silvyo OVADYA Köşe Yazısı
16 Ağustos 2017 Çarşamba

Esta semana keria eskrivir sovre la politika. Sovre lo ke se pasa en el mundo. Dospues pensi “ke echo tengo entre los lokos” porke estos anyos dalkavo mesklarse en la politika es kayer al lodo. De una vanda un loko Amerikano ke no save kualo es diplomasia, de la otra vando un mansevo Kim Jong Un, el dirijente prinsipal de la Korea del Norte ke es un loko atavanado. Esta djugando kon la Amerika sin pensar lo ke puede afitar a la fin. Oy en diya malorozamente kon las armas ke se fabrika ya puedemos ver todo modo de desgrasyas. Estos son los malores de este siglo. Esto esperando ke vamos a tener en el futuro ombres o mujeres ke se enteresan a la politika i ke van a ser mas diplomatikos.

 Si vos parese ke solo esto es el malor de este siglo vos yerrash. En la eskola mos ambezimos ke la era dalkavo empesa en el 1789 kon la Revolusyon Franseza i se yama “La Era Serkana” (Yakın Çağ). No se deke estamos durmyendo i no estamos yamando esta epoka “La Era de los kompyuteres”. Reelmente muestra vida fonksyona kon los kompyuteres.

 Unos kuantos diyas antes un taksi indose kon una rapidez alta izo un freno para no pizar a una manseva ke estava pasando la avenida mirando su telefono. Dospues del freno el taksi ke estava viniendo de detras chapteo al de delantre i los dos shoferes estavan gritando detras de la ija porke fue kavza del aksidente.

 Esto es un kavzo. Ma oy en diya indo a un restoran – mizmo muy shik - puedesh ver la grande partida de djente ke estan asentados al lugar de konversar estan kon sus iphones. Reelmente esto es la hazinura de este siglo. En Estanbol, el Ospital ke se topa en Bakırköy es para los lokos i el puevlo lo yaman “timarana”. Antes aviya personas ke los yamavan lokos; despues una grande partida de este ospital fue empleado para personas ke son adiktos de la droga (uyuşturucu madde bağımlısı). El otro diya aviya un program en la radyo eksplikando ke este Ospital formo un muevo pavyon para los adiktos (bağımlı) de kompyuteres o de telefones ke azen todo. En dizyendo “todo”, ya se ke no es kapache de gizar i de azer el lavado. La mas grande partida son mansevos o mansevas i no azen nada. Todo el diya, mizmo la noche estan kon estos apareyes. No avlan, no meldan gazetas o livros, mizmo no komen. I para estos mansevos avriyeron un muevo pavyon para reabilitarlos i azerlos personas sosyales. Ay munchas personas ke no avlan muncho. Ma kreo ke no es una hazinura; son entravados/das (çekingen) i no les plaze muncho avlar kon la djente.

  En siertas sedutas vesh ke el denfrente no esta kon vozotros. Puedeser ke es muy entelijente i aze munchos echos, ma el denfrente no entiende i le parese ke no kere estar en kontakto kon vozotros. Ma kuando esta meldando mesajes o haberes k etiene dingun dar i aver kon esta seduta no estash muy kontentes de la situasyon.

  Esto va ser mas negro. Mi ija ke tyene trenta i tres anyos kreo ke ay anyos ke se echa kon el telefon ke se topa a sinkuenta santimetros. Los ke tyenen vente anyos empesaron a emplear el telefon kuando tenian dyes anyos. Para eskapar ayer la noche mi inyeta ke tyene dos anyos tomo el telefon ke lo tenia ensima las meza i empeso a travar fotos! Puedesh imajinar una kriatura de dos anyos tomando fotos kon el telefon? Esto no era posivle trenta o kuarenta anyos antes...