El augmento irreprimivle del terorizmo

Silvyo OVADYA Köşe Yazısı
14 Aralık 2016 Çarşamba

Noche de alhad – a la djudia - shabat la noche, komo lo bivimos, tuvimos la posi-bilidad de irmos a un lokal en Topağacı - Nişantaşı, ande avia una kantadera ke mos kanto en italyano, en fransez i en espanyol. Komimos siertas komidas ke mos plazyo. Supito todos okupados kon sus telefones o kon sus iPhones. Kualo afito? Whatsappes, mesajes i postas elektronikas de kada punto del mundo. Los primeros, los turkos israelyanos ke miran los kanales turkos mizmo en Israel i ke son enfor-mados kon los mesajes ke pasa en las televizyones turkas.

I dospues los turkos ke biven en diferentes sivdades de la Evropa. Todos para kudyarmos porke dos bombas fueron patladeadas en Estanbol dospues de la salida de un mach de futbol. I los diridjentes del pais limitaron las enformasyones para pueder apanyar los ke ayudaron, organizaron i izyeron este atako teroristiko matando mas de 45 personas onde la mas grande partida eran polises ke asegur-avan la seguridad de la djente. I munchos ke pasavan por este lugar en los taksis o en los otobuses. Ke desgrasya. Mansevos i mansevas ke aprometian (vaat etmek) un avenir briyante, ombres ke no reusheron a ver sus kriaturas ke stan en la tripa de sus mujeres, mansevos ke pensavan a demandar – mizmo esta noche - la mano de una manseva.

 Tuvimos mas de syen i sinkuenta feridos (yarali). En todos los ospitales se topa munchas personas en mala situasyon. Reelmente este fue un evenimiento muy atristante (üzücü).

Komo lo savemos i lo savesh, malorozamente el terorizmo ke es la konsekuensa del problema de los Kurdes no se esta kalmando. Los problemas ke se bive en los paizes vizinos esta enflamando estos movimyentos nasyonalistos ma no apasiguadores.

Kero kompletar mi artikolo en partajando lo ke estamos biviendo kada vez ke keremos anunsyar a los ke van a pueder vinir de otros paizes para “el Dia del Ladi-no” ke vamos a organizar en el mez de marso. Es la tresera vez ke kuando keremos dar siertos detalyos estamos biviendo un evenemento teroristiko. I desidamos de estar kayados. Tenemos otros tres mezes, ma kreyo ke los ke keren o kerian venir no son tan korajozos komo mozotros mizmo si keremos organizar un viyaje priva-do para vente - vente i sinko personas.

Vos oguro dias yeno de paz.