DESPUES DE 80 ANYOS DE SU MUERTE, STEFAN ZWEIG (1881 – 1942)

“TODOS LOS PUENTES ENTRE EL OY, EL AYER I EL ANTIYER ESTAN ROTOS”

Aze 80 anyos en febrero, ke el otor el mas popular de Evropa, se suisido en Petropolis, una sivdad breziliana. Zweig nasio en una famiya rika i kultivada en Vienna. Resivio una edukasion ekselente i avlava el Latin, el Fransez, el Ingles i el Grego. Tenia doktora de filozofia de la Universita de Vienna. Su padre era fabrikante de tekstil i su madre, ija de una famiya de bankeres italianos. Eran una famiya edukada i kompletamente entegrada a la kultura almana. A parte su orijin, la relijion judia no fue nunka parte de su edukasion. “Mi padre i mi madre eran judios por un aksidente de nasimiento”, disho Zweig. El era enamorado de la kultura evropea i no se sintio nunka atirado por el movimiento de Theodore Hertzel. El eskrivio una sola istoria sovre el judaizmo, “El kandelabre enterrado”, istoria de un judio, ke su objektivo de vida era de prezervar la menora.

Su konsantrasion prinsipal era en favor del umanizmo evropeo. Ya estava konsiente ke reinava un nasionalizmo ekstremo. El keria inkulkar a las personas el sentimiento i el orguyo de ser “Evropeo”. Antes de la primera gerra mundial, el eskrivio sovre la idea utopika de una Evropa unika, pasifista i sin frontieras nasionales. Fue el primer ke motivo la ideolojia de la Union Evropea. Durante la gerra de 1914-1917, para servir su patria, se eskrivio voluntario para lavorar komo archivisto de guerra.

En 1920, Zweig se kazo kon Frederika Von Winternit i se instalo en una kaza maraviyoza, en medio de la natura, serka de Salzburg. En este atmosfer feeriko, eskrivio sus mas famozas ovras. Estava enserklado de artistos i entelektuales de su epoka, komo Freud, Einstein, Thomas Mann, James Joyce, Dali, Toscanini i Richard Strauss por ken eskrivio un libretto.

Zweig fue el eskritor el mas popular de Almanya. Fue tradusido en 50 linguas. Era muy popular i todo lo ke eskrivia se konvertia en oro. A parte de sus romansos i biyografias ke le dieron su reputasion, el eskrivio ovras teatrales, poemas, kronikas de viaje i izo munchas traduksiones. Era un ombre a ken le gustavan las relasiones sosiales. Bushkava a kreer kontaktos entre personas, porke pensava ke estas relasiones yevarian a unos interkambios kulturales pozitivos. Su intelekto estava vibrando ariento de el i en su konsekuensia, estava produsiendo muevas ovras a kada momento.

Jeneralmente, las fantazias de los intelektueles kon los de los politikos no koinsidan. La ideolojia de una Evropa unida no estava en kamino de realizarse. En 1933, los Nazis kemaron los livros de Zweig i de todos los eskritores judios. Sus sentimientos umanistos se estavan desparesiendo. La venida de los Nazis al poder i la asfiksia de los judios fue intolerable para Zweig. Kon el korason roto, el fue ovligado de deshar su patria amada, i kon su sigunda mujer Lotte, empeso el nomadizmo. Por el, el langaje de Schiller, Goethe i Rilke se avia okupado i deformado por el Nazizmo.

En primero emigro a Londra. En 1940, tomaron la sujesion ingleza, ma Zweig no se sintio bien i pasaron a Nueva York. La amerikanizasyon era para el, la segunda destruksion de la kultura evropea. Se siente mal. De Amerika se pasa al Brazil, pais ke lo avia fasinado durante una konferensia. Se instalo en Petropolis, kaji a 50 km de Rio de Janeiro. Ayi eskrivio “Brazil, Tierra del Futuro”. La ambiensia le plazia “todas diferentes rasas biven en kompleta armonia entre eyos, no ay barriera de kolor, no ay segregasion”. Ma su anksiedad i su desguste de la vida no lo deshava repozado. Se sintia estranjero en todos los paizes i no tenia esperansa ke la gerra se terminara. Se desida de suisidarse. Su nota: “Mi propia lingua se desaperesio de mi espiritu i Evropa se destruyo a si mizmo”.

“Mi kriza interior proviene porke yo no me puedo identifikar kon el “yo” de mi pasaparto i el “yo” del egzilo”. La idea ke el nazizmo iva envahir el mundo, no lo deshava sintir su libertad i del espanto empeso a pedrer su ekilibrio mental. Era de natura pasifista.

“Prefero terminar mi vida en el momento djusto, komo un ombre para ken, el lavoro kultural fue siempre la mas pura de sus alegrias i de su libertad personal, mi mas presioza posesion en esta tierra. No me kedo mas la fuersa de asperar la salida del sol, ma vozotros devesh de asperarlo absolutamente”.

La djilve de la istoria:

Por el asko de Hitler, Zweig se suisido kon su mujer i despues de 3 anyos  kuando los Rusos konkistaron la Almanya, Hitler se suisido kon su mujer.