Kaminando i Avlando

Silvyo OVADYA Judeo-Espanyol
18 Kasım 2020 Çarşamba

   Es diya de djugeves ke resivi un paketo - esta vez reelmente un paketo – de Fransia ke estava vinyendo de la revista “Kaminando i Avlando”. Este numero estava bastante voluminozo. Kuando avri el paketo vi el numero 36 de la revista de 64 ojas i por la primera vez su suplemento de 76 ojas. I ay unos kuantos diyas ke esto meldado estas revistas. Es djusto ke son artikolos bastante largos ma son reelmente enteresantes. Konosko solo el chef redaktor de la revista, el senyor François Azar ke lo invitimos a Estanbol dos anyos antes al diya del Ladino 2019. Ya se ke ay munchas personas ke le ayudan para ke esta revista apareska. Kero rengrasyar a François i a todos sus amigas/amigos ke le ayudan. No se ke ayedad tyenen. Ma se ke François es bastante mansevo i yeno de enerjia. Kuando meldash esta revista, vesh ke la mas grande partida es eskrito en fransez. Es djusto ke ay munchos artikolos ke fueron eskritos en judeo-espanyol. Ma para mozotros los Djudios de la Turkia los artikolos son muy enteresantes porke la mas grande partida de los artikolos son sovre los Sefaradis de orijin Otomana o Turka. La revista kontyene munchas istoryas de estas personas mizmo si estan kontadas en Fransez. Esta revista es muy emportante para los Djudios de Turkiya. Esta revista es tambien muy emportante para la lingua judeo-espanyola i es muy emportante para la Kultura Sefardi.

   Noche de Alhad en los Enkontros de Alhad avia un reportaje kon la sinyora Roz Kohen orijinarya de Estanbol, ke bive oy en diya en los Estados Unidos i ke eskrive livros sovre la vida djudia de Estanbol. Kuatro de sus livros fueron publikados en Estanbol. La Sinyora Rachel Bortnick era la balabaya en este reportaje. I eya es una persona eksepsyonal. Kreo ke lavoro muncho antes del program.

   Demandi la palavra durante el program. Avlando di el haber ke los ke keren, van a pueder ser abonados al Amaneser dijitalmente. I pagando el abonamyento mas resonavle porke no estamos pagando la posta. I los enteresados van a pueder meldar el Amaneser el mizmo diya ke va ser publikado.

   Dando este haber Rachel Bortnick no fue muy kontente. Porke koma mi, le plaze meldar las gazetas en papel. Kuando esto resivyendo un artikolo en el internet me plaze printarlo en papel para meldar el artikolo este modo. Avia eskrito un artikolo en el Şalom dizyendo ke estamos prontos a publikar el Aki Yerushalayim en papel para 100 personas. I es sola Rachel ke me embiyo una repuesta positiva para esta idea. Reelmente oy en diya tenemos solo i solo un numero de Aki Yerushalayim ke fue publikado en el internet. I es djusto ke se puede publikar en papel. Si ay enteresados ke meldan este artikolo i ke son enteresados kon esta idea estamos prontos para este evenimyento. Despues de 20 o 30 anyos es djusto ke se puede topar en el internet. Ma mi opinion es komo Rachel Bortnick ke la revista publikada va ser mas bushkada mizmo si los mansevos oy en diya preferan el internet.

   Esto eskapando mi artikolo felisitando François Azar i sus amigas/amigos por sus esforsos ke estan azyendo para la Kultura Sefaradi i para publikar la revista Aki Estamos.

Siz de yorumunuzu yapın

Tüm Yorumları Görün