En el Amaneser del mez de Oktobre en la primera oja vemos el empesijo de un muevo Proyekto; kualo es este proyekto? Ay tres Mohikanos ke estan dando kursos de Judeo-Espanyol en diferentes payises i sivdades. Todos estan dando estos kursos en el enternet. Vos avia dicho ke la Corona sirvyo al Djudezmo o al Ladino. Es vedra. Kreo ke muestro Sentro ke lavora muncho no izo esforsos para ensenyar la lingua de muestros avuelos a los mansevos. Ya savemos ke no es mas una lingua ke devemos de averguensarmos. Es una lingua ke puedemos avlar kon grande orgolyo. Ya vemos letras i artikolos de los elevos de Bryan Kirschen; Rachel Bortnick i Liliana Benveniste. No se kuantos elevos tyenen i si es por la primera vez ke azen kursos en nuestra lingua. El echo de Liliana deve de ser mas kolay porke el Judeo-Espanyol es una lingua mizmo un diyalekto de los Sud Amerikanos. Ya savemos ke esta lingua es muy serka al Espanyol del Sud Amerika. Ya meldi dos vezes lo ke eskrivyeron los elevos de Bryan, Liliana i Rachel. Fui empresyonado por el artikolo de Juan Sanchez de Seatle / Washington. Es un mansevo de 13 anyos. Ke felisidad. Un mansevo de 13 anyos. Se esta merekiando komo va ser el futuro de esta lingua. Juan Sanches, no te merekies. Si te ambezates esta lingua i si ay munchos mansevos ke se van ambezar esta lingua vas a ver ke se va avlar en el 21en siglo. Todos los ke ensenyan esta lingua kreo ke empesaron sus lavoro i sus esforsos kon el empesijo de la Korona. En los artikolos no esto vyendo ke edad tyenen los ke estan eskrivyendo. Ma estamos vyendo ke esta lingua se puede ensenyar fasilmente. Kualo es muestro dover? En primero de kontinuar el Amaneser para ke estas personas puedan topar artikolos para meldar. Esto muy kontente de ver ke el Aki Yerushalayim kon sus 210 ojas va ser un otro manadero para los ke se enteresan en esta lingua. Muestro segundo dover va ser el Sit de Enternet de muestro Sentro. Reelmente devemos de produsir muncho material para ke empleen anyos enteros. Estamos lavorando para realizar muevos albumes (no kero dizir CD’s - porke los CD’s no egzisten mas mizmo si mozotros el Sentro Sefardi kontinuamos a produsir muevos CD’s. Vos djuro ke dimos a el portal el mas emportante uno o dos albumes i resivimos 2 liras turkas en dos anyos i medyo. En el mizmo tyempo reushimos a vender serka de 1.000-1.200 CD’s. Si un CD es 20 liras es un echo de 25.000 liras. El CD ke realizimos kon el Sentro de Erensya de los Djudios de Salonika i de Gresya por las kriaturas reelmente fue un proyekto muy reushido. Ma el Sentro de Israel dyo karar de no azer un CD porke no se emplean mas los CD’s – yo los esto empleando. Azer kualo? Un usb para pueder sintir este album en la komputadora. No lo izyeron. Oy en diya kualo estan azyendo los muzisyenes ke azen muevos albumes? Spotify? no se si es bastante ekipado para CD’s de esta manera. Kero felisitar estos mansevos ke reusheron a eskrivir estos artikolos. Ma lo mas emportante es de pueder ensenyar. Devemos de felisitar Rachel, Brian i Liliana. Reelmente estan azyendo un echo muy emportante.
Bryian Kirscen ve Liliana Benveniste
Mozotros el sentro Sefardi de Estanbol tenemos el dover de organizar kursos asemejantes. Este modo mas i mas mansevos se van a ambezar la lingua de sus avuelos. DEKE NO!
