EL FONDADOR DE LA ASTRONOMIA MODERNA, KOPERNIK

Şeli GAON Judeo-Espanyol
19 Ağustos 2020 Çarşamba

                           

                           

            “No ay nada ke no sea nesesaryo en la natura. Solo una razon es sufizyente para produsir munchas kozas”. Esto es la perspektiva de Kopernik en sus lavoros…

Su manera de vista es ke: todo esta muy armonyozo en la natura, djusto, kompleto, konforme al buto i sinyifikativo.   

            “Kopernik” antes un kurto tyempo de su muerte publiko un livro intitulado “De revolutionibus orbium coelestium”. Este livro es el punto, la perioda emportante en la istorya de la “SENSYA”. La Revolusyon de Kopernik ampeso kon este livro. Galileo, Bruno i munchos otros astronomes se enfluensaron de esta revolusyon i realizaron munchas deskuvyertas en el buto, en el kamino ke les amostro Kopernik. 

             “Kopernik” nasyo en 02.02.1473 en la sivdad “Torun” en la Polonya. La kaza ande nasyo esta protejada oy mizmo i restorada. Kopernik estudyo en kaza kon su madre i padre. El padre se muryo kuando teniya 10 anyos. Su tiyo se okupo de el. Nikolai Kopernik estudyo en la eskola relijyoza “Aziz Yana”. Kuando termino se fue a Krakov para la universidad. Akel tyempo esta universidad era muy famoza. Munchos elevos de la Alemanya, Suedia, Italya estavan vinyendo para estudyar aki. El orden edukativo de esta eskola estava en la Edad Media. La baza de la edukasyon era sovre la teolojiya. La gramer, la lojika, la retorika, muzika, matematika, geometria i la astronomia eran las lesones las mas emportantes.

En la epoka de Kopernik la edukasyon en la Evropa estava deprimida, pasando una depresyon grande. La ida verso la epoka de la Illuminasyon se aviya akselerado. En todas las partes, el spirito de la investigasyon se aviya arribivido.

               Kopernik teniya una kuryozidad illimitada. Se enteresava en todo. Era muy prove i se estava averguensando de esta situasyon. No teniya entereso para la politika ni para la vida sosyal. La Italya era el pais el mas emportante para Kopernik. El estudyo la ley fina el anyo 1503 en la universidad de Padova. Despues se fue a Ferrara para estudyar la lisans alta. Ferrara era una sivdad muy emportante sovre la kultura. Ma, Kopernik torno a Padova para estudyar la medikeria. 

Akel tyempo la medisina teorika era la mas respektada. Kopernik prefero esta bransh porke se estava ambezando las lesones de “Ibn-i Sina, Galen i Hipokrat”.

Estudyo tres anyos i penso ke tyene una mankura; komo era un ombre relijyozo deviya de saver la ley de las eglisyas perfektamente. Torno a Italya. Se entereso en la astronomia, tomo lesones de matematik i se ambezo el grego antiguo i asimilo muy bueno la filozofiya de “Platon”. Teniya un karakter dubyozo.

                Kopernik aviya ampesado a sus lavoros de reforma en astronomia kuando estava en Italya. Su punto de vista era: “los objektos del syelo deviyan de tener un movimyento sirkular ordenado porke el orden i la armoniya se adjustan a las kozas sakras i perfektas”. 

Kopernik aviya dicho: “Si me aviyan konsultado sovre la kreasyon del mundo, todo se aziya muncho mas fasil”.

Kopernik lavoro su vida entera para pueder trokar todas las doktrinas ke egzistiyan, i krear un sistema muevo en la astronomia. 

 

 

        

                                            

Siz de yorumunuzu yapın

Tüm Yorumları Görün