El Diya kuando el Palyacho Yoro

Dora NİYEGO Judeo-Espanyol
22 Temmuz 2020 Çarşamba

"The Day the Clown Cried" (El Diya kuando el Palyacho Yoro) es un filmo suezo-fransez ke Jerry Lewis dirijo i djugo el rolo del protagonisto. El filmo es sovre un palyacho de sirko ke esta emprizonado en un kampo de konsantrasyon de los nazis.

Lewis djugo el rolo de un palyacho aleman ke se yama Helmut Doork. Es el empesijo de la Segunda Gerra Mondyal i el Olokosto. Helmut fue arrestado por la Gestapo porke avlo negro sovre Alemanya i se burlo de Adolf Hitler una noche ke estava borracho. 

Un diya, el kampo resivyo un grande grupo de prisionyeros judyos, ombres mujeres i kreaturas. Helmut las estuvo azyendo riyir a las kreaturas para ke se olviden un poko las kondisyones negras del kampo.

Un diya le disheron de meter todas las kreaturas aryento de un vagon i yevarlas a Auschwitz ande los ivan a embiyar a la muerte en la kamareta de gaz.

Komo saviya el espanto ke las kreaturas ivan a sintir, se desido de pasar los momentos dalkavo kon eyos. Yevandolos a las "duchas",  kada vez estuvo asperando un milagro, ma no uvo dingun milagro. Sintyendo grande remorso por ser aleman, tomo la mano de una ijika, i kamino kon eyos a la muerte. A la fin del filmo, en la kamareta de gaz, las kreaturas se riyen, el palyacho yora.  Esta shena final es la mas triste shena del filmo.

La entision de Jerry Lewis, kuando se desido de filmar este filmo, era muy seryoza. Lewis kijo amostrar los orores del Olokosto, i amostrar el lado umano del evento. Lewis estudyo el Olokosto en profundidad antes de aparejar el filmo. Se fue munchas vezes a Auschwitz i a Dachau, i peryo 35 kilos en sesh semanas, para pueder djugar el rolo de una viktima del kampo de konsentrasion. Jerry Lewis mezmo izo un akordo kon una guardya vyeja de la SS, para ke el kampo de konsantrasion seyga reel.

En el anyo 2009, Jerry Lewis aksepto una entrevista de una gazeta. Lewis les disho ke estava muy orgoyozo de aver djugado este rolo.

Jerry Lewis, se topo kon un ombre, Rolf Greiber, ke en la gerra era enkargado de travar la kuedra de la kamareta de gaz, ke iva entosegar los prizonieros. Lewis keriya ke Rolf le konte todo lo ke se paso en la kamareta de gaz. Ma mezmo ke se enforso muncho, Lewis no pudo estar en la mezma kamareta kon Ralf. Ralf disho ke estava muy triste por lo ke aviya echo.

En una entrevista kon la televizion alemana, Jerry Lewis disho ke paso krizas de yorar mas de vente vezes en azyendo el filmo.

Mas despues, Jerry Lewis penso ke amostrar en los sinemas, una komedia de un evento tan triste, no iva ser djusto por las viktimas i los sovrebivientes. Kijo guadrar una kopiya del filmo en una kasha ke dingunos no ivan a pueder avrir. En el anyo 2015, Lewis permetyo ke este filmo seyga guadrado kon unos kuantos otros de sus filmos en la Biblioteka del Kongreso, i ke seyga amostrado en los sinemas en el anyo 2025.

Siz de yorumunuzu yapın

Tüm Yorumları Görün