La Agada Kolorada

Kenan CRUZ Judeo-Espanyol Sesli Dinle
8 Temmuz 2020 Çarşamba

El otro diya fui a la sivdad para bushkar i merkar unos livrikos muevos para meldar en estos diyas de plaj i pisina. Me gustan muncho los enveranos kuando puedo echarme al lado de la agua i debasho del sol, pasando tiempo a meldar kozas muevas, oyir muzika, i gozar del tiempo luzyo. En Lisboa, fui a un magazen chiko de livros de segunda mano i pasi kaji una ora a bushkar los livros ke van a akompanyarme durante estos diyas. Uno de los livros ke topi fue algo ke imediatamente me intrigo; era un livro sovre la kultura popular de los djudios en las primeras dekadas de la Union Sovyetika. Al mizmo tiempo era un sujeto del kual no saviya muncho ama ke me interesava bastante. En jeneral me gusta muncho meldar sovre istoria, i la Union Sovyetika es un tema ke siempre kero ambezarme mas. Asta oy, tuve la oportunidad de viajar a algunos payizes ke antiguamente eran parte de esta union, i kada uno reelmente se akodra de la istoria sovyetika en una manera distinkta. Por egzemplo, en Moldovya i Armenya senti un aire de nostaljiya a la epoka sovyetika, ama en la Ukranya i Georgiya senti kompletamente el kontrario. 

 

En este livro me ambezi un alay de kozas interesantes ke nunka aviya meldado o oyido antes. Ya saviya ke la politika ofisyal en la Union Sovyetika era el ateizmo del estado. Entonses tambien saviya ke el estado serro munchas de las iglesyas i de los kales en el payiz. Lo ke no saviya era ke la politika de los sovyetikos sovre sus sivdadanos djudios era para krear un grupo nasyonal en lugar de un grupo relijyozo. Kon esta politika el estado empeso a avrir eskolas para ke todos los djudios en el payiz se ambezen el yiddish. Estas eskolas tambien se tornaron en puntos importantes para la propaganda sovyetika. Komo el estado keriya transformar las tradisyones djudias relijyozas a tradisyones nasyonales se entrodusieron kozas ke oy es difisil de kreer. Por egzemplo, en este tiempo era posivle topar karne de puerko ke era kasher. Komo puede ser? Sigun los sovyetikos todo lo ke era djudio era otomatikamente kasher, porke kasher sin el elemento relijyozo para eyos solo sinyifikava djudio. Entonses, sigun esta mentalidad, si un shohet djudio preparava puerko, esto tambien era konsiderado kasher.

 

Mas una koza ke no pude kreer kuando lo meldi, fue ke los sovyetikos entrodusieron una mueva Agada de Pesah. En esta Agada, ke se yamava Agada kolorada, kaji todos los biervos fueron trokados. El biervo “Dyo” fue trokado por “revolusyon de oktubre”, las letras de dayenu fueron trokadas kon letras anti kapitalistas, i las letras de “ehad mi yodea / ken supyense i entendyense” fueran trokadas ansina: “... tres internasyonales, dos Lenin i Trotsky, uno es Karl Marx i no ay dingun otro”. Esto todo me surprendo muncho. Ama agora ke se mas sovre este konteksto istoriko, entyendo muncho mijor la situasyon aktual de los djudios de la antigua Union Sovyetika, ke oy en Israel son konsiderados uno de los grupos mas sekulares en el payiz.

Siz de yorumunuzu yapın

Tüm Yorumları Görün