Amin Maalouf

Eliz GATENYO Judeo-Espanyol
17 Haziran 2020 Çarşamba

Antes de la Corona mos se  areskuresyo la alma i el korason en viendo en las gazetas i en la televizyon las trajediyas de los poveretos emigrantes. Ombres, mujeres i kriyaturas, sin topar de kualo komer i entezandosen en el friyo. El Dio ke les ayude.

En estos mezes i diyas ke estavamos enserrados en las kazas teniyamos la posibilidad de meldar livros bol bol. 

A esta okazyon vos kero avlar de un grande eskrivano Amin Maalouf, istoryano, pensador i romansero ke tiene agora 71 anyos i ke fue resivido a l’Academie Française desde el anyo 2012.

Amin, nasyo en Ayifto. Eyos  eran kristianos. El  i su famiya fueron arondjados afuera de Ayifto, egzaktamente komo los judios, en deshando todos sus bienes, alora ke biviyan aya en prosperidad desde munchas jenerasyones. Despues del golpe de Cemal Abdulnaser, peryeron todo lo ke teniyan. Kazas, echos, paras i sovre todo el payis ke amavan tanto. 

Se fuyeron a Lebanon, ande teniyan paryentes i ampesaron aya una vida mueva en bivyendo todas las difikultades, ampesando de zero, de trokar payis i de kultura. 

Amin mos esta avlando de Beirut ke akel tiempo aviya depasado en modernita el Kairo, tanbien esta analizando la Siria. El mos konta tanbien la revolusyon en Iran kon Humeyni, las trajediyas de la Afrika del Sud kon Mandela.   

No vos puedo kontar el livro entero, solo me va kontentar de dizirvos ke tuvyeron de salir tanbien de Lebanon, por razones politikas ke ya savemos.

Ma lo ke vos kero kontar es, unas ideas orijinales suyas, sovre la situasyon de los payises ke arondjaron una parte de sus puevlos i de los payises ke los aresivyeron, durante la istorya.

Asigun Maalouf, desde el 15en asta al 17en siglo i fina oy en diya, mos konta las ekspulsyones masivas ke izyeron mas muncho danyo a los ke kedaron ke a los ke mandaron. 

Un egzemplo ke konosemos muy bien, es la ekspulsion de los Judios de Espanya en 1492 ke vinieron al Imperio Otomano. Enrikesyeron el payis kon su djente instruida, doktores, merkaderes, impresores, alora ke la Espanya los peryo. El sultan de akel tiempo, Bayazit II aviya dicho: Agora la Espanya se emprovesyo i mozotros mos enrikesimos.

Otro egzemplo es el tiempo de la Sigunda Gerra Mundial, los akademisyanes ke fueron arondjados de la Alemanya, se refujiaron a la Turkiya. Estos akademisyanos profesores fondaron universitas i seksyones ande dieron enstruksyones en diversos estudios. Ke paso? Gano la Turkiya i se undio la Alemanya. 

Esta balansa, komo tahtaravalli es eksplikado klaramente en el livro de Amin Maalouf ke vos rekomendo de meldar. El livro se yama “Le naufrage des civilisations”. Se puede traduizar al ladino komo “La undisyon de las sivilizasyones”. Ke sepash ke la traduksyon en turko ya salyo en vendidad en las libreriyas, kon el nombre “Uygarlıkların Batışı”.

 

Siz de yorumunuzu yapın

Tüm Yorumları Görün