El diya memoravle: 10 de Mayo, 2020, me izo pensar al poeta fransez ke era enamorado de Estambol:
THEOPHILE GAUTIER (1854)
"Fui una errante en la mar de la luz,
me izo kantar la kolor de las melodias komo un koro selestial".
Entre las yervas freskas, las akasyas parfumadas i los pinos vedres, deskuvri el blu briyante del BOSFOR.
El sielo maraviyozo briyando, los pasharos bolando i la mar klara reflektando el kalmo devran predominar en mis tablós? No lo se... antes de tomar lugar delantre de mi chevalet.
Akeyos arvoles, antes dos mezes yenos de ojas freskas, estan yenos de prunas chikas o serezas savrozas.
No se si los lugares o los peyzajes mizmo muy konosidos los va reflektar tekstualmente...
Va reorganizar kon mi paleta una kompozision propia a mi...
Va reinterpretar el lugar i lo va imajinar komo lo kero ver.
Va fraguar mi tela para dar una nota de mis sensasiones intimas...
Ver las ermozuras de la kreasion,
ver amaneser una natura perfekta,
es un mesaje de muestro Kriador...
Me va permeter de kopiar un pasaje i rengrasiar RAV YEUDA ADONİ:
Bear-Behukotay (la Perasha de la Semana):
"Avlo el Kriador a Moshe en el monte Sinay dizyendo:
Avla a los ijos i diles:
Kuando viniresh a la tierra ke yo vos dare, olgara la tyerra Shabat a el Todo Poderoso...
Sesh anyos sembraras tu kampo i sesh anyos apodaras tu vinya i akojeras tu renovo...
En el anyo seteno avra Shabat de olgansa a la tyerra, Shabat a el Kriyador tu sembres tu kampo i apodes tu vinya...
El Shabat de la tyerra vos sera para komer, a ti, a tu syervo i a tu syerva i a tu kuatropea, i la bestia ke uvyere en tu tyerra...
"La perasha mos embeza todo lo ke es de menester de azer, para ke tengamos el merito de alkansar a la bendision de el Kriyador, bendicho sea su nombre..."
Keridos lektores, vos sueto una primavera kon todos djuntos...
SHAVUOT ALEGRE
