LA VIDA ESTA EMPESANDO A NORMALIZARSE

Dora NİYEGO Judeo-Espanyol
13 Mayıs 2020 Çarşamba

En poko tyempo, la vida va empesar a normalizarse. Kualo van a ser las kondisyones de esta mueva vida? Devemos de trokar todo lo ke aziyamos antes, para pueder protejarmos de la pandemiya. Todos keremos sosyalizarmos; ir a los sinemas, teatros konsertos u restoranes, azer spor en los sentros de spor, ir a las pisinas i a las plajes, vijitar muestros keridos, entrar libremente a los magazenes, suvir a los transportes publikos, viyajar kon el avyon, ir a los sentros de arte: kurto, azer todo lo ke aziyamos antes de la pandemiya.

Todos keremos ke las kozas tornen a la normalidad rapidamente, ma no van a tornar antes de unos kuantos mezes. I puede ser ke algunas kozas nunka van a tornar.

Lo ke devemos de azer es mantener una distansya sosyal para frenar la propagasyon del virus. Esto sinyifika ke la pandemiya vyene a un nivel basho u puede ser fin ke se topa una vaksina.

Los investigadores estan dizyendo ke kada vez ke los hazinos pujan, meter restriksyones a la distansya sosyal, i kuando empesan a aminguar, tornar a las kondisyones de antes. Ke kere dizir ‘meter distansya sosyal’? Esto sinyifika ke todos deven de azer todo lo posivle para minimizar la komunikasyon sosyal, i en jeneral, si todos aplikan las reglas, los hazinos se aminguan a 75%.

Parese ke esto va ser el empesijo de un stilo de vida kompletamente diferente.

Siguramente ke este stilo de vida va azer grande danyo ekonomiko a un grande grupo de firmas: restorantes, kafeteryas, bares, diskotekas, djimnazyos, oteles, teatros, sinemas, galeriyas de arte, sentros komersyales, muzeos, muzikos, salas de konferensyas i otros.

Puede ser ke va aver otras adaptasyones: los djimnazyos pueden empesar a vender ekipos de djimnazya i azer sesyones pagadas en el internet. Muevos servisyos va empesar. Algunos uzos va trokar i puede ser ke syertos van a ser benefisyozos komo mankos viyajes ke keman karbon, mas muncho kaminar, mas muncho ir kon bisikletas. 

Ma malorozamente munchas firmas se van a serrar u van a ganar manko. Por egzamplo, solo la mitad u un kuarto de las salas de los sinemas u teatros se van a inchir, los restoranes van a meter mankas mezas, las reunyones se van a azer en mas grandes salas. 

Mezmo kon estas prekosyones, kale topar remedyos para entender ken esta enfektado, ken no esta. Kale ke ayga sinyales ke van a avertir las personas por los enfektados. Por egzemplo, kuando mos vamos a suvir a los avyones, vamos a tomar sinyales por no aserkarmos a los hazinos.

 

En algunos payizes, ya savemos ke ay reporteros para prevenir peligros, komo por egzemplo, en Israel los servisyos de intelijensya lo azen para prevenir por los teroristos.

No savemos egzaktamente komo el muevo futuro va ser. Ma, kreygo ke los payizes van a ser mas aparejados para muevas pandemiyas. Van a tener mas munchas unidades de entervansyon pandemika, mas munchos ekipos medikos, mas munchos kits para azer diagnozis i mas munchos medikamentos para pueder identifikar la pandemiya i aktuar rapidamente antes ke empese a propajarse.

 

Siz de yorumunuzu yapın

Tüm Yorumları Görün