Los Siegos

Eliz GATENYO Judeo-Espanyol
6 Mayıs 2020 Çarşamba

En un kazal aviya un ombre ke teniya un ojo siego. Viya solo kon un ojo. Un diya se enfasyo de estar en su kazal i izo el torno de la sivdad. Yego a un kazaliko chiko. Ma este kazal no paresiya a los otros kazales. Todas las fraguas estavan diferentes. Remarko ke los moradores de este kazaliko eran todos siegos. Disho de si para si, si estos todos son siegos, yo ke tengo un ojo, puedo ser el shefe de este kazal, komo dize el proverbo: En el payis de los siegos, el ke tiene un solo ojo, es rey. En avlando kon eyos se rendyo kuento, ke estos tienen muy fuertes sentidos del oido, del goler. Un diya este sinyor, vido ke un siego se estava arovando el bien de un otro siego. Siguro, dinguno mas ke el no lo vido. El ombre ampeso a gritar… Ay ladron, fulano se arovo el bien de sistrano. De ande lo supites, le demandaron. El, ampeso a kontarles ke el ve todo, mizmo de leshos. Ma no estava puediendo darles a entender lo ke era “ver”. La djente del kazal le estavan demandando. Kontamos, kualo es ver? Mozotros mos dirijamos kon el bruido. Todo lo ke azemos, lo entendemos de los bruidos i del guezmo. “Bueno” disho el ombre ke teniya un ojo, andavos a este tepe ke se topa a la fin del kazal… i azé djestos, i yo de aki vos va dizir lo ke veyo. Ansina dicho, se fueron al tepe, se asentaron en los bankos, el ombre les disho, “estash asentados en los bankos”. Despues ampesaron a komer, el ombre les disho “estash komiendo”. El savio de la sivdad le disho “EEE, esto no es marafet grande, esto ya te lo puedo dizir i yo, porke ya esto oyendo el bruido de las kucharas i de los chinis”. “Agora dizemos lo ke azen veremos” disho el savio… i todos los del tepe, entraron aryentro de una kuliba a komer. El ombre ke teniya un solo ojo, no estava puedyendo ver lo ke estavan aziendo por ke estavan aryentro de la kuliba. Ma la djente del kazal entendyeron ke estan komiendo, por ke puediyan oyir el mas chiko bruido de leshos, ke muestro ombre no puediya oyir. Su senso de oido no era tan developado, komo los de totalmente siegos. Alora disho el savio: Tu sos mintiroso… No puede aver una koza semejante. Te vamos a egzaminar. Pishin yamaron al doktor del kazal ke i el era totalmente siego, para ke lo egzamine. Vino el doktor i ampeso a egzaminarlo. Ampeso a palpar el un ojo i sentio ke estava serrado, dunke no estava viendo de este ojo. En lo ke palpo el otro ojo, sentio ke el ojo estava avierto …i disho “Na! Aki tiene este ombre problema, ke no esta puedyendo oyir de muy leshos komo mozotros. El chare es de siegarle i este ojo, para ke pueda oyir i goler komo mozotros.” Esto ke oyo el ombre, ampeso a fuyirse del kazal en koryendo, para salvarse de los siegos. Esta konsejika se eskapa aki. Ma mos kere dar una leson: Los ke no ven, no pueden entender a los ke ven. Les parese bavajadas. I en keryendo enderecharlos, les kitan los ojos para asemejarlos a eyos mizmos. (Esta leson, en dizyendo “los ke no ven” no kere dizir “los siegos” verdadmente. Kere dizirmos los ke son inyorentes i los ke mankan de rikeza de alma.)

Siz de yorumunuzu yapın

Tüm Yorumları Görün